Timor Post (16/06/2020)– Sekretáriu Estadu Formasaun Profisionál Empregu Julião da Silva hateten foin lalais, katak iha tempu besik traballadór iha Korea no Australia sei fila hikas mai, maibé data seidauk fiksu tanba nasaun viziñu Indonézia no Singapura sei kontinua lockdown.
“Ha’u hanoin governu Korea ne’e laiha problema maibé iha problema ne’e mak governu Singapura ho Indonézia, se indonézia ho Singapura kuandu loke ona aeroportu hodi bele halo tránzitu ita bele haruka sira fila ona” esplika ba Jornalista sira iha sede FONGTIL kaikoli tersa (16/06).
Governante ne’ebé atu assume fali pasta Vice Ministru iha MNEK argumenta liután Governu bele halo Fligth hosi Korea direita mai timor maibé problema mak pista aeroportu ki’ik.
“Aviaun mai ne’e aviaun boot. Maibé sei halo pedidu nafatin ho governu Singapura no indonézia hodi husu sira nia tulun, tanba ita nia karta ba tiha ona ba nasaun rua ne’e iha loron (11/05) ne’e maibé to’o agora ha’u seidauk hetan fali resposta”, hatete Julião.
Enkuantu traballadór ne’ebé atu fila hosi Korea hamutuk nain-60 resin tanba kontratu remata, maibé agora governu ajuda fali sira hodi sira kontratu fali fatin seluk no agora kontinua servisu hela tanba situasaun covid-19.
Enkuantu iha Australia kuaze traballadór Na’in 20-resin inklui traballadór feto na’in haat ne’ebé iha kondisaun gravida.
Jornalista: Jaime Pires
Editor: Mariano Martins
851 total views, 6 views today
