Timor Post (14/06/2020)—Sidadaun estranjeiru na’in-13 inklui feto na’in-3 ne’ebé ho ró-ahi ida mosu iha tasi ninin illa Jako-Postu Administrativu Tutuala, Munisípiu Lautem, peskador sira hetan iha Kinta kalan (11/06/2020) no Ekipa Sentru Integradu Jestaun Krize (SIJK) ba COVID-19 akompaña husi parte Polísia xefia husi Komandante Calisto evakua ona ba Dili iha loron 13/06/2020 hodi halo investigasaun.
Ema na’in-13 ne’e inklui sidadaun husi nasaun Vietnam na’in-11 no na’in-2 husi Indonézia mak lori ró-ahi ne’e.
Tuir kronolojia ne’ebé haktuir husi Administradór Tutuala , Karlito Pereira ba Timor Post, bainhira peskadór sira husi Tutuala hetan ró-ahi ne’e iha kalan boot, sira tenta halo informa ba autoridade seguransa iha Tutuala, maibé tanba rede telekomunikasaun laiha maka iha dader maka sira foin halo kontaktu.
Administradór haktuir, informasaun ne’ebé nia rasik hetan bainhira ho parte seguransa ba hasoru sidadaun sira ne’e iha Jako katak, sira nia viajen hahú husi Jakarta, ba Makasar, ba Kendari no atu kontinua sira nia viajen maka mina ro-ahi maran iha tasi klaran no laloran baku ro-ahi ne’e ba mosu fali iha illa Jako.
Iha informasaun husi sidadaun Indonézia na’in rua dehan, ró-ahi ne’e sidadaun Vietnam sira mak hola no selu sira ho osan rupiah juta sanulu (Rp. 10 Juta) hodi tula sira ba Dárwin-Austrália. Maibé informasaun husi sidadaun Vietnam sira katak, sira nia viajen husi Indonézia atu ba Vietnam.
“Sidadaun Indonézia rua ne’e, ida husi Kefa maibé hola feto iha Kendari no ida seluk ema Kendari duni maka lori ró-ahi ne’e. Sira dehan sai husi Kendari ba Darwín-Austrália, maibé informasaun ne’e iha fali versaun rua katak, sidadaun Vietname sira dehan atu ba Vietnam,” Administradór haktuir.
Administradór dehan, bainhira nia rasik ba to’o iha Jako, fasilita mina hodi enxe ba ró-ahi ne’e hodi tula sidadaun sira ne’e husi Jako ba Tutuala hodi halo investigasaun, maibé tanba parese ró-ahi ne’e mina maran ona iha tasi klaran no laloran maka baku to’o tasi ninin no xoke iha fatuk no ahu-ruin sira maka ró-ahi labele funsiona no paradu total iha fatin ne’e.
Nune’e, Administradór haktuir, peskadór sira maka tula duni sidadauk hirak ne’e ho bero hodi ba hatún iha Tutuala no ekipa husi nasionál rasik inklui parte saúde ba halo teste ba sira nia saúde liuliu tau atensaun maka’as antisipa pesti corona (COVID-19).
To’o notisia ne’e publika Timor Post sei halo hela konfirmasaun kona-ba sidadaun sira ne’e iha Dili konsentra iha ne’ebe hodi hetan investigasaun husi autoridade kompetente. (cao)
926 total views, 18 views today
Bele hare Video Seluk :
Subscribe to Timorpost
