Timor Post (12/06/2020)– Primeiru Ministru Taur Matan Ruak, iha nia diskursu ofisial serimónia troka Prezidente Autoridade Rejiaun Administrative Espesiál Oecusse-Ambeno, hosi Luis Guterres ‘Lugu’ ba Arsénio Paixao Bano iha Palasiu Governu, Sesta (12/06) hateten, Oekusse la’ós espesiál maibé povu mak espesiál tuir konstituisaun fó.
“Oe-Cusse la’ós espesiál maibé populasaun mak espesiál ne’e konstituisaun fó uluk, tanba ne’e mak governu hotu-hotu halo esforsu tau melor sidadaun rekursu umanu iha ne’ebá no tau rekursu finanseiru ne’ebé nesesáriu, tanba ne’e Oe-Cusse tau rekursu finanseiru liu munisípiu sira seluk”, hateten Matan Ruak iha nia diskursu fo Pose Prezidente Autoridade RAEOA datoluk Arsenio Paixao Bano
Eis prezidente da Repúblika ne’e espresa nia iha priviléjiu tanba ba dala tolu nia fó pose ba Prezidente Autoridade RAEOA.
“Ha’u iha priviléjiu tanba agora ne’e ba dala tolu ha’u fó pose ba prezidente Autoridade Rejiaun Espesiál Oe-Cusse ninian. Primeiru ba Mari Alkatiri, iha momentu ne’ebá hanesan Prezidente Repúblika, segundu José Luis Guterres, terseiru mak agora ita boot Arsénio Bano, maibé ha’u espera hanesan primeiru ministru labele fó tan pose”, dehan Xefe Governu daualuk ne’e.
Ba Prezidente Autoridade foun Taur husu uza aproveita oportunidade ida ne’e dezenvolve Oe-Cusse.
“Ha’u kuandu Prezidente Repúblika kada tinan ha’u ba dala rua tanba Oe-Cusse situasaun difisil kompara ho fatin sira seluk. Oe-Cusse pobreza, ki’ak analfabetizmu mal nutrisaun as iha ne’ebá maibé povu ida ne’e Jenerozu tebes”, haktuir PM.
Jornalista: Jaime Pires
Editor: Mariano Martins
619 total views, 3 views today
Bele hare Video Seluk :
Subscribe to Timorpost
