Timor Post (10 Juñu 2020) – Maski ko’a ona subsídiu populasaun maibé asaun autoridade lokál nian hapara imediatamente husi Ministru Administrasaun Estatál (MAE) Miguel Pereira de Carvalho.
“Horisehik autoridade lokál konsege ko’a ona osan kuaze ema 70 resin maibé hapara imediatu aktus ne’e. Ha’u husu autoridade lokál labele halo aktus sira nee”, hatete Ministru Miguel hafoin remata reuniaun estraordináriu Konsellu Ministru, iha Palasiu Governu, Kuarta (10/06).
Tuir identifikasaun ne’ebé iha asaun autoridade lokál ko’a $10 husi subsídiu $ 200 ba família ne’e akontese iha pagamentu subsídiu loron dahuluk iha Munisípiu Bobonaru.
“Ministru kontakta ona ho Administradór Bobonaru hapara ona aktu ne’e husi autoridade faborai tanba illegal”, esplika Ministru foin sa’e ne’e.
Miguel mós imediatamente kontakta ho Administradór postu Maliana, haruka autoridade lokál refere fó fila-fali osan ne’ebé rekolla hosi sidadaun sira hetan monetáriu $ 200 hosi Governu.
Nia apela ba autoridade hotu-hotu atu bele de’it regras distribuisaun monetáriu ba komunidade sira tuir dekretu lei 15/2020 no diploma konjuntu entre MAE no MSSI.
“Bainhira halo tuir nee mak loos. Ha’u husu autoridade lokál labele halo aktus sira nee” Ministru hakotu.
Jornalista: Jaime Pires
Editor: Mariano Martins
676 total views, 6 views today
Bele hare Video Seluk :