Timor Post (10/06/2020)—Timor-Leste no Japaun estabelese ona relasaun amizade ne’ebé forte husi povu pais rua ne’e iha tinan barak nia laran. Hahú kedan molok Timor-Leste nia independensia, Japaun fo ona asisténsia ba Timoroan nia prosesu hari’i nasaun no dezenvolvimentu ekonomia.
Komunikadu ba imprensa ne’ebé Timor Post asesu haktuir, programa oioin ne’ebé Governu Japaun hala’o ona iha Timor Leste mak hanesan; Programa Fundu Asisténsia ba Seguransa Umanitaria ba Komunidade sira, ho naran badak “GGP” maka ida, husi programa lubuk seluk. Programa GGP implementa liu husi ONG lokal/Internasional no Organizasaun sira la-holukru ne’ebé fo asisténsia ba komunidade sira iha Timor-Leste. Ho fundu GGP nia implementasaun iha aréa-rural, bele fó asisténsia direta ba komunidade no responde duni kumunidade nia nesasidade báziku iha aréa edukasaun, saúde no bee moos.
Fundasaun APLIMENTEC nudar ONG lokal iha munisipiu Liquiҫa, implementa ona ho susesu projetu GGP iha tinan 2019. Dez-de hahu iha tinan 2002, sira implementa ona projetu barak hodi melhora asisténsia saúde, saneamentu no hadia asesu bee moos ba komunidade sira iha aréa rural. Iha aldeia Karlema, suku Darulete, lokaliza iha foho leten munisipiu Liquiҫa nian, komunidade sira susar tebes atu asesu ba bee moos. Iha sistema bee tuan, maibe a’at kleur loss ona, nune’e, loron-loron komunidade tenke la’o do’ok kuaze metro 1,000 to’o 3,000 resin hodi kuru bee ba nesasidade. Hatan ba komunidade nia pedidu no preokupasaun ida ne’e, Fundasaun APLIMENTEC hato’o proposta ba fundu GGP iha Embaixada Japaun atu halo konstrusaun foun ba sistema bee moos. “Projetu ne’e lori mudansa positivu barak no iha impaktu ekonomia di’ak ba komunidade nia moris” Sr. Nuno Miguel Ximenes, Diretor NGO Aplimentec afirma. Sr. Nuno mos apresia no hatutan tan; “Agora, feto no labarik sira la-gasta tempu barak hodi ba kuru bee no sira nia atividade agrikola produtivu liu kompara ho uluk.” Projetu ida ne’e benefisia total populasaun hamutuk 400 resin, husi uma kain 90, estudante no profesores 250 resin bele asesu ona ba bee moos no hadia sira nia bem-estar.
Governu Japaun implementa ona programa GGP dez-de tinan 2000 no implementa ona iha munisipiu 12 inklui RAEOA ho nia total fundus por-volta US$ 11 miloens. Fundu GGP elegível ba ONG lokal/internasional no Organizasaun sira la holukru mak iha interese atu ajuda povu Timor-Leste liu husi fundu GGP. Agora dadaun Embaixada Japaun simu apliksaun ba fundu GGP to’o loron ikus fulan Augustu 2020. Ba aplikante sira mak prense kriteria, keta lakon oportunidade! Hakarak hetene liu tan, bele kontaktu ba Embaixada Japaun ho numeru telefone: 332-3131. (*/cao)
1,284 total views, 3 views today
Bele hare Video Seluk :
Subscribe to Timorpost
