Timor Post (09/06/2020)—Ministru Defeza no Ministru Interior Interinu, Filomeno Paixão de Jesus informa, nia parte dadauk halo hela proposta ba Orsamentu Jerál Estadu (OJE) ba tinan 2020 nian foku liu ba selu deve liuliu iha Polísia Nasiona Timor Leste (PNTL).
Paixão hatete, tanba OJE 2020 nian ba fulan hirak de’it maka nia parte uza oportunidade atu foku deit ba selu deve, no ba tinan 2021 maka sei foku ba invetimentu no programa prioridade sira hodi responde ba nesesidade instituisaun rua ne’e nian.
“Primeiru Ministru bolu ha’u ko’alia uitoan relatóriu kona-ba kestaun defeza no seguransa no mós kona-ba hanoin oinsá ba orsamentu 2020 ne’ebé lato’o tan fulan neen ona ita atu halo ba forsa no defeza,” Paixão haktuir ba Jornalista sira hafoin hasoru malu ho Primeiru Ministru Taur Matan Ruak, iha Palásiu Governu, Tersa (09/06/2020).
Nia hatutan, dívida iha instituisaun rua ne’e boot liu iha PNTL liuliu iha telekomunikasaun inklui telefone selu CCTV ne’ebé monta iha sidade Dili no manutensaun ba viatura sira ne’ebé tuir estimasaun atinji liu millaun rua.
“Ida ne’e mak preokupa aserta tenke selu tia lai atu nune’e orsamentu 2021 ne’e ho pájina mós ida ne’e mak Primeiru Ministru orienta atu halo depois haree fali ba fulan tolu haat ba oin ne’e,” Paixão salienta.
Ba tinan 2021, Paixão dehan, ba parte defeza sei foku ba siguransa marítima, seguransa fronterisia, tanba F-FDTL mós agora reforsa iha fronteira terestre, sei iha vizilánsia marítima liuliu ba kosta sul atu bele kopera ho Austrália ba patrolla konjuntu, no ho Amérika hadi’a Aeroportu Baukau.
“Ita tau avioneta iha ne’ebá atu halo vizilánsia no iha mós kompañia Ingles ida atu azuda ita treinu atu loke sala operasaun boot ida atu panoram maritima iha kosta sul, leste, norte, oeste no mós fronteira,” Paixão komenta.
Planu hirak ne’e, Paixão dehan diskuti ona ho Primeiru Ministru atu tau ba iha prátika.
Nia dehan, hanoin mós kona-ba droka atu halo fabriku droka seka depois ita bele hadi’a ita nia ro ba mikitar sira ne’ebé mak at durante ba hadi’a iha indonezia halo despeza ne’ebé mak boot di’ak liu ita loke de’it iha ne’e depois hadi’a iha ne’e de’it.
Jornalista: Jaime Pires
537 total views, 3 views today






