Timor Post (08/06/2020)—Embaixada Estadus Unidus Amérika (EUA) iha Dili, Timor-Leste halo doasaun desinfentante konsentradu liu litru 1,500 no material limpeza sira seluk ba Sentru Integradu Jestaun Krize nu’udar parte ida husi reposta atual ba pandemia COVID-19.
Komunikadu imprensa ne’ebé Timor Post asesu husi Embaixada EUA haktuir, apoiu ne’e inklui materia formasaun atu konverte desinfentante konsentradu ne’ebé oferese ne’e ho seguru atu sai fali líquida limpeza nian litru liu 750,000.
Material sira ne’e entrega husi Embaixadora EUA Kathleen Fitzpatrick no Xefe Gabinete Kooperasaun Defeza Major Pablo Valerín.
“Estadus Unidus parseria ho governu sira iha mundu tomak atu hapara propagasaun COVID-19,” hateten Embaixadora EUA Kathleen Fitzpatrick. “Ho fornesimentu material desinfentante no material formasaun sira ne’e, ami espera katak estudante Timor oan sir abele fila hikas ba eskola no ba konsulta iha sentru saude ho siguru.”
Projetu ne’e finansia husi Komando Militar Indo-Pasífiku EUA no ida ne’e parte ida husi orsamentu apoiu COVID nian hamutuk $125,000.
Projetu ida ne’e mos parte ida husi orsamentu liu millaun $1.6 ne’ebé alokadu atu apoia governu Timor-Leste luta hasoru COVID-19. Iha Timor-Leste, Estadus Unidus investe ona millaun besik $70 ba asistensia saude no liu millaun $542 iha total apoiu ba nasaun ne’e durante tinan 20 nia laran. (*/cao)
717 total views, 3 views today
