Timor Post (08/06/2020)—Segunda, (08/06), Prezidente Autoridade Munisípu Manufahi (PAMM), Arantes Isaac Sarmento ofisialmente halo lansamentu ba lista agregadus uma kain ribun 14.918 ba suku 29 iha postu administrativu Same, Fatuberlio, Turiskai no postu Alas.
Iha seremonia lansamentu ne’e, Arantes hatete, dadus agregadus uma kain ne’ebé iha hamutuk rihun 15.900.00 husu minisípiu lori ba aprezenta iha Ministériu Administrasaun Estatal (MAE) kontinua ba Ministériu Solidaridade Sosíal no Inkluzaun (MSSI) halo verifikasaun fó sai rezultadu iha rihun 14.918 família agregadus.
“Munisípu haruka lista agregadus rihun 15.900.00 maibé rezultadu fila fali mai hetan de’it agregadus 14.918 signifika barak naran hasai tanba lei la haruka ema ne’ebé simu osan dolar atus 500.00 ba laten no ida ne’e ba de’it ema ne’ebé hetan salaríu atus 500.00 mai kraik” hatete, Arantes liu husi nia intervensaun iha areadores administrasaun Munisípu Manufahi, Segunda, (08/06).
Tanba ne’e agradese tebes ba kooperasaun serbisu ne’ebé mak halo husi xefe aldeia, suku hodi submete relatóriu mai Munisípu maibé dadus refere agregadus balun naran iha no balun mós sira nia nara laiha neduni nafatin halo atendementu ba komunidade bainhira hato’o reklamasaun.
“Ha’u husu ba administrador postu fatin 4 atu halo atenndementu ba komunidade balun ne’ebé naran laiha lista tanba ne’e autoridade suku, postu tenki koopera ho ekipa meja reklamasaun hodi hare ema ne’ebé naran laiha lista”nia hatete.
Neduni husu ba parte autoridade ho ekipa meja reklamasaun atu fó informasaun klaru ba komunidade bainhira naran laiha lista no labele halo fali komunidade sai konfuzaun, neduni tenki fasilita meja reklamasaun ba sira ne’ebé naran laiha.
“Ita tenki atende komunidade sira ninia reklamasaun bainhira sira nia naran laiha lista tanba tuir lei reklamasaun durante loron 15 hafoin halo pagamentu, tanba pagamentu besik ona ha’u simu informasaun husi agregadus balun dehan sira nia naran laiha”nia dehan.
Reprezentante governu sentral iha Munisípu ne’e apela ba agregadus sira ne’ebé naran laiha atu labele halo ekstrundu iha fatin pagamentu maibé hakat ba meja reklamasaun hodi hodi halo levantamentu atu nune’e bele hetan solusaun.
“Husu mós ba ekipa pagamentu atu halo tuir prosedimentu ne’ebé bainhira se’es husi prosedimentu ita bo’ot sira mak hakarak duni atu hasoru problema neduni tenki la’o tuir regras ne’ebé iha atu nune’e prosesu pagamentu bele la’o ho di’ak”nia sublina.
Molok hakotu nia dehan, papel Ministériu Administrasaun Estatal (MAE) asegura prosesu pagamentu ho masimu tanba ne’e husu ba administrador postu, diretores serbisu munisipais sira hotu atu fó apoiu masimu, bainhira ekipa pagamentu presiza apoiu no tulun tenki prontu tantu kalan ka loron tanba programa refere programa estadu no governu ninian.
Tempu hanesan diretora Sentru Solidaridade Sosíal Munisípu Manufahi (SSSMM), Eulalia Maria Seixa husu ba ekipa pagamentu atu kumprimentu regulamentu no prosedimentu serbisu tuir mata dalan ne’ebé iha nune’e labele mosu desentendementu iha fatin pagamentu nia laran.
“Maibé importante mak ita hotu tenki kooperasaun entre instituisaun Ministériu Administrasaun Estatal (MAE) ho Ministériu Solidaridade Sosíal no Inkluzaun (MSSI) atu nune’e infrenta difikuldades iha tereinu bele hamutuk hodi buka solusaun iha tereinu”nia hatete.
Tuir dirtora katak, agregadus kada suku la hanesan tanba suku balun agregadus uma kain barak no suku balun agregadus uma kain la dun barak neduni ba ekipa ne’ebé remata ona pagamentu labele fila ba ida-idak nia uma maibé kontinua apoiu fali ekipa seluk ne’ebé halo hela pagamentu ba suku balun ho volume agregadus barak.
“Ita tenki kumpri regras serbisu iha tereinu tuir regulamentu katak serbisu durante loron 10 tuir lei desidi ona, neduni ekipa balun halo pagamentu remata ona iha suku balun kontinua apoiu fali ekipa seluk iha tereinu”nia hakotu.
Enkuantu fatin hanesan, komandante komandu polisía distritu Manufahi superentendente, Jonia Viana da Regras hatete, polisia iha ona planu ne’ebé klaru bazeia orientasaun komandu jeral PNTL mai Munisípu atu orienta komandante eskuadra atu fó seguransa adekuadu ba prosesu pagamentu iha teritoriu Timor.
“Tanba ne’e husu mós ba ekipa pagamentu atu halo liña koordenasaun ho Ofisial Polisía Suku (OPS) 29 ne’ebé destaka iha suku 29 ba postu administrativu fatin 4 iha Manufahi hodi fó apoi seguransa masimu iha tereinu”nia dehan.
Tuir observasaun Timor post nota katak, total orsamentu U$. 2.983,600.00 hodi halo pagamentu ba agregadus uma ka’in rihun 14.918 iha suku 29 husi postu administrativu Fatuberlio, Same villa, Alas no postu administrativu Turiskai ne’ebé sei realiza loron Tersa (09/06). Enkuantu hafoin hetan lansamentu husi Prezidente Autoridade Munisípu ekipa kontinua desloka kedas ba postu administrativu fatin 4 nune’e bele halo pagamentu ba agregadus sira tuir suku ida-idak. (lcl)
1,045 total views, 12 views today
Bele hare Video Seluk :
Subscribe to Timorpost
