Timor Post (05/06/2020)—Estadu Unidus Amérika (EUA) liuhusi Embaixadora Kathleen M, Fitzpatrick iha Dili promete fó apoiu aviaun ida ba FALINTIL-Forsa Defeza Timor Leste (F-FDTL) hodi halo vizilánsia no prepara tiha ona osan hamutuk millaun $10 hodi halo kontrusaun ba Aeroportu Baucau.
“Aeroportu Baukau nian ne’e EUA tau ona Millaun $10. Sira hakarak ho F-FDTL haree nia planeamentu ba oin hodi komesa halo servisu, tanba sira atu fó aviaun ki’ik-ida para atu halo vijilánsia,” Ministru Defeza no Ministru Interiór Interinu, Filomeno da Paixão de Jesus, haktuir ba Jornalista sira, Kinta (04/06/2020), hafoin enkontru ho Embaixadóra Kathleen.
Entretantu Embaixadora hatete, projetu reabilitasaun Aeroportu Baucau, nia parte hein hela bainhira Governu Timor-Leste konklui prosesu maka ekipa tékniku sira halo ona servisu iha terrenu.
“Ami hala’o reuniaun atu atualiza progresu iha ami nia kooperasaun ho Governu Timor-Leste iha área defeza no prosesu atu hadi’a projetu Aeroportu Baukau,” Kathleen haktuir liuhusi konferénsia imprensa iha Edifísiu Ministériu Defeza, Fatuhada, Dili.
Aeroportu Baukau iha governu dahuluk hasai naran Vicente Reis “SAHE”. (cao)
771 total views, 3 views today
