DILI—Prezidente Parlamentu Nasionál, Aniceto Guterres informa, nia parte halo ona preparasaun ba hadi’a hikas meza Prezidente Parlamentu Nasionál ne’ebé naksobu iha loron 19 Maiu 2020 bainhira mosu tensaun maka’as entre deputadu sira tanba atu hala’o destituisaun ba Prezidente Parlamentu Nasionál sesante Arão Noe no eleisaun ba nia asumi hikas pasta ne’e.
Aniceto dehan, tuir planu atu hadi’a hikas meza ne’e sei konbina serimónia kultural no relijiozu nian.
“Ami sei ko’alia ho Amu Bispu para bele hatudu padre Pároku ruma para atu fó bensaun depois de serimónia kultural,” Aniceto ba Jornalista sira hafoin ho nia estrutura ba komprimenta Prezidente Repúblika Francisco Guterres Lú Olo iha Palásiu Prezidensiál Baairro-Pité, Dili.
Aniceto dehan, nia halo ona reuniaun ho Sekretáriu Jerál Parlamentu Nasionál no autoriza ona forma komisaun organizadora ida para atu halo prepararasaun ba serimónia ritual ne’e.
“Se meza ida rahun ne’eba ne’e klaru ke tenke halo meza foun ida para Prezidente ho komponente meza tomak bele okupa fatin ne’e hanesan normal,” nia hatete. “Konforma ita hatene buat ritual sira ne’e, kultura timor nian ne’e la’o tuir nia regra, entaun sei lori tempu uitoan, maibé ami inisia ona preparasaun ba iha ne’eba, ke osida to’o ikus ne’e taka ho ritual relijioza nian,” Aniceto subliña.
Entretantu deputadu husi bankada Partidu Libertasaun Popular (PLP), Cornélio Gama L-7 temi hotu rai lulik iha Timor Laran no husu atu lori karau hamutuk-13 hodi hadi’a alias halo tuir hikas meza Prezidente Parlamentu Nasionál nian ne’ebé naksobu iha loron 19/05/2020.
L-7 foti pontu de órden iha sesaun plenária, Tersa (02/06/2020) hafoin deklarasaun polítika husi Bankada CNRT kona-ba situasaun ne’ebé akontese iha momentu ne’eba konsidera asaltu poder husi bankada FRETILIN, PLP ho KHUNTO hodi destitui Prezidente Parlamentu Nasionál sesante Arão Noe hodi hili hikas Aniceto Guterres ba pozisaun dahuluk liu iha órgaun estadu daruak ne’e.
CNRT defende katak meza ne’ebé naksobu deputadu CNRT sira ba asegura maibé tanba hetan atake maka’as husi deputadu sira husi bankada FRETILIN, PLP ho KHUNTO maka meza Prezidente Parlamentu Nasionál nian naksobu.
Iha deklarasaun polítika bankada CNRT nian afirma, deputadu sira CNRT iha Parlamentu Nasionál deside marka hikas prezensa iha plenária hafoin deklara ho nia aliadu sira (UDT/FM ho PUDD) la rekoñese Aniceto Guterres nu’udar prezidente ba órgaun daruak ne’e tanba eleitu husi dalan ilegal.
Tanba ne’e, CNRT afirma, ho lideransa Kayrala Xanana Gusmão, hatur metin no defende Estadu Direitu Demokrátiku katak, kualker asaun polítika sira tenke bazeia ba Konstituisaun no Lei odinária sira no CNRT sei hamarik no tuba iha primeira liña hodi la-admite no latolera kualker aktu polítika sira ne’ebé hakarak legitima koportamentu polítika sira ne’ebé realiza ho forma tácito no expresa hodi viola normas konstitusional. (cao)
1,471 total views, 3 views today
Bele hare Video Seluk :
Subscribe to Timorpost
