DILI—Membru sira husi Partidu CNRT ne’ebé durante ne’e tama iha estrutura governu daualu lideradu Primeiru MInistru Taur Matan Ruak (TMR) desidi retira ona husi sira nia kargu.
Membru hirak ne’ebé desidi retira mak hanesan Ministru Prezidénsia Konsellu Ministru, Agio Pereira; Ministru Negósiu Estranjeiru no Kooperasaun (MNEK), Dionisio Babo Soares; Ministra Edukasaun Juventude no Desportu (MEJD), Dúlcia de Jesus; Sekretáriu Estadu Juventude no Desportu (SEJD), Nélio Isaac; Vise Ministru Administrasaun Estatal, José Abílio Caetano; Sekretáriu Estadu Kooperativa, Arsenio Pereira; Sekretáriu Estadu Arte no Kultura, Teofilo Caldas.
Hafoin entrega karta rejignasaun ba TMR, Dionisio Babo Soares ba Jornalista sira subliña, nia kumpri desizaun partidu nian sai husi governu ida ne’e tanba situasaun polítika.
Entretantu situasaun polítika hahú kedas husi Prezidente Repúblika Francisco Guterres Lú Olo lakohi fó posse ba maioria membru governu husi CNRT la ho rajaun klaru.
Ho nune’e, ho tan rajaun seluk kona-ba kapasidade governu daualu ne’ebé forma husi CNRT, PLP ho KHUNTO, lideradu TMR, ikuas mai orsamentu 2020 nian xumba iha PN. No situasaun polítika sai manas liu tan bainhira mudansa boot iha PN hodi hatun Prezidente Parlamentu Nasionál Arão Noe, no hili fali Aniceto Guterres la liuhusi eleisaun normal. No ikus mai CNRT deside sai husi governu daualu.
Entretantu membru governu indijitadu ne’ebé Xefe Estadu la fó pose iha governu daualu mak hanesan Ministru Finansa, Helder Lopez, Ministru Turizmu, Komérsiu no Indústria, Francisco Kalbuadi Lay, Minstru Asuntu Kombatente no Libertasaun Nasionál, Virgílio Smith, Ministru Saúde, Sérgio Lobo, Ministru Interiór (deklara rezigna-aan ona), António Verdial, Vise-Ministru Justisa, Amandio Benevides, Vise-Ministru Negósiu Estranjeiru no Kooperasaun, José Turquel.
Enkuantu, Ministru Planeamentu no Investimentu Estratéjiku, Samuel Marçal ho Ministru Petróleu no Rekursu Minerál, Alfredo Pires, prezidente repúblika aseita fó pose, maibé kandidatu na’in-rua ne’e lakohi tanba hakarak fó solidariedade ba kandidatu membru governu nain-hitu seluk. (cao)
915 total views, 3 views today
Bele hare Video Seluk :
Subscribe to Timorpost
