DILI (Timor Post.com)— Nu’udar jerasaun foun hakarak kompete iha eleisaun suku loron 28 Outubru 2023, tanba ho prinsípiu sefia suku la’ós tan oportunidade maibé responsabilidade.
“Ha’u nia prinsípiu hanesan jerasaun foun ida, ka’er ukun atu servi komunidade, liuliu suku foho-Ailiku, postu Administrativu Hatu-udu, munisípiu Ainaru,” Herculano Visente-Assala Visente, alumni Universidade Nasionál Timor Lorosa’e, (UNTL), Departamentu Polítika Publika (PP), ba Timor Post.com iha Bebora, Dili, Kuarta-feira (20/09/2023).
Tu’ir estudante Herculano Visente, jerasaun foun, oan husi povu fila ba servi nia povu. maibé lá signifika tanba oportunidade, maibé tanba responsabilidade ba komunidade. No lakohi sai oportunizmu, tanba servi komunidade presiza pratika la’ós retórika,
“Nu’udar jerasaun foun, prontu servi komunidade ho responsabilidade iha area remotes, liuliu iha suku Foho – Ailiku. Atu dezenvolve suku, presiza kontribuisaun komún,” nia dehan.
Uluk jerasaun tuan, lori ona povu dezenvolve Auku no aldeia sira. Ohin, hanesan jerasaun foun, prontu hamriik fali, atu defende no hamutuk ho komunidade, servi responsabilidade.
“Ha’u fiar, inan no aman ne’ebé hahoris nia oan, ohin nia oan rasik prontu hamriik hodi defende no lidera, no servi fali sira, mak fiar sei fó konfiansa ho fuan no domin. La’ós ho lia-fuan atu estraga sira – nia interese moris iha suku no aldeia,” Herculano Visente hateten.
Alende ne’e, Javelino Domingos da Silva, husi suku Bukoli, postu Triloka, Munisípiu Baukau dehan, jerasaun foun ho jerasaun tuan prinsípiu atu sai Lider iha suku, tanba kapasidade mak servi no dezenvolve suku.
Nia dehan, jerasaun ne’ebé di’ak mak jerasaun ne’ebé dezenvolve komunidade – nia interese, no dezenvolve mós suku ka aldeia sira.
“Jerasaun foun ida, la’ós atu Kompete ho jerasaun tuan, maibé tanba hakarak servi no hatán preokupasaun sira ne’ebé suku hasoru no nasaun hasoru,” nia afirma.
Entretantu atuál Xefe suku Bauro, Sidalio Freitas husi postu Lospalos, Munisípiu Laútem hatete, lei fó dalan atu re kandidata fila-fali. Maibé, orgullu bainhira jerasaun foun sira komesa hatudu kapasidade no hakarak sai xefe suku ka lidera suku.
“Ita apresia tebes ba kapasidade jerasaun foun sira, liuliu iha suku Bauro, no munisípiu sira hotu, ne’ebé, Jove ho idade produtivu sira de’it mak kompete ba eleisaun suku. Ne’e istória ida, ne’ebé hatudu mós sinál atu nasaun Timor Leste atu avansa ba oin, ” nia hateten.
687 total views, 3 views today
Bele hare Video Seluk :
Subscribe to Timorpost
