ADVERTISEMENT

Funu Poder Polítiku Manas iha Parlamentu Nasionál, Seguransa Kontroladu

Timor Post - Jeral
  • Share

DILI—Funu ba poder polítiku hahú manas bainhira deputadu sira husi bankada FRETILIN, PLP ho KHUNTO aprejenta pedidu destituisaun (troka) Prezidente Parlamentu Nasionál Arão Noe. Nune’e, sai manas liutan bainhira mosu planu husi bankada tolu ne’e obriga Vise Prezidente Parlamentu sira atu lidera plenária iha loron Segunda (18/05/2020) maske laiha delegasaun kompeténsia husi Prezidente Parlamentu Nasionál.

Iha loron ne’e deputadu husi bankada ida-idak marka hotu prezensa iha Parlamentu Nasionál, maibé ida-idak mantein de’it iha nia bankada no balun la’o ba mai iha plenaria laran. Tuir informasaun husi tékniku sira iha Parlamentu Nasionál sira kumpri de’it órden de servisu husi Prezidente Parlamentu Nasionál maske Vise Prezidente Parlamentu Nasionál Maria Angelina Lopes Sarmento fó orientasaun balu atu fasilita plenária nian.

ADVERTISEMENT
SCROLL FILA BA NOTISIA


Prezidente Parlamentu Nasionál Arão Noe, iha loron ne’e, iha oras tuku 9:00 organiza kedas konferénsia ba imprensa hodi kondena maka’as tentativa hadau Prezidente Parlamentu nia Poder ne’ebé halo husi Vise Prezidente Parlamentu Deputada Maria Angelina Lopes Sarmento.

Lee Mós :
Tau-Matan ba Faluk no Oak Ki'ak Ne'ebé Saudozu Amândio de Sá Benevides Husik Hela

Aktu sira ne’ebe konsidera nudar tentativa hadau poder maka hanesan tuir mai ne’e:

  1. Iha loron 13 Maiu 2020 Bankada Fretilin, PLP, no Khunto dirije Rekerimentu Distituisaun Prezidente Parlamentu Nasional ba fali Vise Prezidente Parlamentu Nasional. Aktu ida ne’e Viola KRDTL Artigu 99 (3), Rejimentu Parlamentu Nasional Artigu 17 kona-ba Kompetensia Prezidente Parlamentu Nasional.
  2. Konstituisaun Artigu 99 (3) hateten momoos katak Parlamentu Nasional Reuni Ordinariamente tuir Konvokasaun Prezidente Parlamentu nian. Tanba ne’e Vise Prezidente Parlamentu Maria Angelina Lopes Sarmento nia aktu sira ne’e viola KRDTL, LOFAP, Kodigu Penal, no Rejimentu Parlamentu Nasional.
  3. Vise PPN Maria Angelina Lopes Sarmento Obriga Xefe Divizaun Apoiu Plenaria ka DIPLEN, Sr. Quintiliano Ase atu ajenda no prepara material ba plenária iha loron 18 Maiu 2020. Aktu ida ne’e viola Rejimentu Parlamentu Nasional Artigu 22 kona-ba kompetensia Vise Prezidente Parlamentu Nasional nian. Vise Prezidente Parlamentu Nasional so bele ezerse PPN nia funsaun bainhira hetan delegasaun kompetensia husi PPN tuir Rejimentu Artigu 22 nu. 3
  4. Tuir prosedimentu normal iha Parlamentu Nasional, Prezidente Parlamentu maka iha kompetensia atu konvoka Konferensia Lideres Bankada hodi aprova ajenda ba plenária.
  5. Bainhira Lideres Bankada sira aprova ona ajenda maka Prezidente halo despaixu ba DIPLEN prepara ajenda ba plenária, se laiha reuniaun líder bankada maka plenária mos laiha.
  6. Xefe DIPLEN konsidera katak prosesu ne’ebe Vise Prezidente Parlamentu Nasional Maria Angelina Sarmento halo ne’e kontra aktu normal funsionamentu Parlamentu Nasional, nune’e devolve fila fali despaixu refere ba Gabinete Vise Prezidente nian.
  7. Tanba la konsege Obriga DIPLEN, Vise Prezidente Parlamentu Maria Angelina Lopes Sarmento halo despaixu ba Sekretariu Jeral atu ajenda Plenaria ba loron 18 Maiu 2020.
  8. Sekretariu Jeral Parlamentu Nasional Divolve Despaixu husi Vise Prezidente Parlamentu Nasional tanba Konsidera despaixu refere Kontra LOFAP Artigu 7.
Lee Mós :
Japão apoia quatro ONG locais com mais de 363 mil dólares

LOFAP Artigu 7 hateten katak tenke iha delegasaun kompetensia husi Prezidente ba Vise Prezidente Parlamentu por eskrita antes Vise Prezidente bele toma funsaun Prezidente Parlamentu nian.

Aktu sira ne’e konsidera nudar hahalok hadau poder ne’ebe kontra Konstituisaun da Republika, Kodigu Penal, Rejimentu Parlamentu Nasional no Lei Organizasaun Funsionamentu Administrasaun Parlamentar.

Lee Mós :
Suku Madohi Bandu Besik Mota-Tasi Ninin

Prezidente Parlamentu REAFIRMA katak Bazeia ba KRDTL Artigu 86 (f), Parlamentu Nasional hein DISOLUSAUN husi Prezidente da Republika. Prezidente Parlamentu Firme hodi defende KRDTL tuir Artigu 2 (2) katak Estadu Hakruuk ba Konstituisaun no Lei Oan sira. Prezidente Parlamentu husu ba ITA HOTU atu Hakruuk no Kumpre KRDTL.

Entretantu tuir observasaun Timor Post iha Uma Fukun Parlamentu Nasionál, seguransa kontroladu husi Polísia Nasionál Timor Leste. (cao)

 1,101 total views,  3 views today

Oinsa Ita nia Reaksaun iha Notisia Nee?
Like
Love
Haha
Wow
Sad
Angry
You have reacted on “Funu Poder Polítiku Manas iha Parlamentu Nasion…” A few seconds ago

Bele hare Video Seluk :
  • Share
ADVERTISEMENT
SCROLL FILA BA NOTISIA

Notisia Timorpost Seluk


Komentariu :
Timorpost.com. Respeita tebes Ita Nia opiniaun. Laran luak no uza etika bainhira hatoo opiniaun. Opiniaun iha Ita Nia responsabilidsde, tuir lei ITE.

Varanda
Kategoria
Video
Buka
Watch
Facebook
error:
Simu Notifikasaun Hosi Timor Post Online! OK No