DILI—Vise Ministra Solidariedade Sosiál no Inkluzaun (MSSI), Signi Chandrawati Verdial, hamutuk ho diretór jerál inklui diretór munisípiu sira, lansa dadus ema vulneravel husi tinan 2021-2022, hosi dadus ne’ebé iha rejista ema vulneravel iha territóriu Timor laran hamutuk rihun 34.
“Ho lansamentu dadus ida ne’e 34 mil ema kbiit laek iha territóriu laran tomak,” nia dehan ba Jornalista sira hafoin lansa dadus Vulneravel Timor laran tomak iha Salaun MSSI, Kaikoli, Sesta (02/06).
Na hatete, dadus ida ne’e sai hanesan baze ida ba governu liu-liu ba Ministeriu Solidariedade Sosiál no Inkluzaun (MSSI), bainhira atu apoiu ajudu ruma haree de’it ba dadus ne’e.
“Ezemplu bainhira haruka foos ba munisípiu atu apoiu ne’e, nia baze saida, haruka ba foos karon hira, atu fó ba maluk vulneravel hira, ema laiha informasaun. Ema ida lansa informasaun katak vulneravel iha fatin ida ne’e, maka ita halai rame-rame ba, ne’e la’ós servisu planeamentu ida di’ak,” nia dehan.
Vantajen husi dadus ne’e kada munisípiu tékniku sosiál sira bele hatene ninia ema vulneravel iha kada postu, bele hatene ema kbiit laek sira ne’ebé eziste ho tipu problema oi-oin. Alende ne’e bele hatene ema vulneravel ne’e hela iha ne’ebé, tanba sá mak nia hetan problema, nune’e hafasil governu atu bele fó apoiu.
Nia dehan, maski lansa ona maibé dadus ne’e sei presiza atuliza nafatin kada tinan tanba dala ruma tinan oin ema ruma mai ho problema sosiál oin seluk.
“Dadus vulneravel atu foka ba ema sira ne’ebé mak labele monu ba risku vulneravel liu, katak ema maioria mak ho problema sosiál barak Ida mak ita nia idozu sira, ema defisiente sira, feto ho labarik sira, no mós ema ne’ebé hanesan grupu abandona sira, ida kruze tebe-tebes ba iha programa sira ne’ebé mak tau iha estratéjia ne’e,” nia hatete.
Hosi dadus ne’ebé iha hatudu katak ema vulneravel barak liu mak Baukau ho Bobonaru ho tipu problema aas liu mak defisiente sira.
Dadus ida ne’e alende atu fasilita governu apoiu ajudu material ka ekipamentu ruma ba vulneravel sira, dadus ne’e mós ajuda governu halo intervensaun ba programa sira seluk, hanesan violénsia bazeia ba jéneru, ema abandona para tékniku sira bele hatene katak, fornese dadus ida ne’e para bele halo planeamentu sira tuir mai.
Vise MSSI ne’e espera katak, parte tékniku sira bele entende didi’ak dadus hirak ne’e nune’e ba oin bele apoiu di’ak liu tan.
Nia mós rekomenda ba governu foun mai presiza kria konsellu Nasionál ida, atu bele kontinua halo avaliasaun no monitoriza programa sira iha nivel sektorál.
1,788 total views, 3 views today
