Timorpost.com | NASIONAL – Governu liuhosi Ministériu Justisa (MJ), esforsu halo komunikasaun ho nasaun seluk hodi bele autoriza timoroan sira uza pasaporte mate maibé bele asesu ba sira-nia territóriu ho estensaun karimbu.
Ministru Justisa, Tiago Sarmento, hatete, nasaun lima kompostu hosi Estadus Unidus Amérika (EUA), Brazil, Nova-Zelándia, Malázia no Indonézia, mak konfirmandu autoriza Timoroan atu utiliza karimbu prolongasaun ba dokumentu importante liuliu pasaporte mate ka liu ona prazu.
“Pasaporte ne’e estensaun no prolongasaun ba karimbu, pasaporte hosi nasaun Amérika konfirmandu, bele uza ba Nova-Zelándia, Indonézia, Brazil no Malázia, kuaze país hirak ne’e aseita ona atu uza karimbu ne’e,” nia hateten iha Palasiu Governu, Kuarta (31/05/2023.
Nia dehan, daudaun ne’e Timoroan barak mak hala’o viajen ba nasaun Indonézia ho pasaporte mate, maibé uza karimbu estensaun nian.
“Ita hein tan semana ne’e, Australia no Singapura ho Korea sei simu tan konfirmasaun, karik hotu aseita hotu ona. Horisehik simu, Estadu Unidus Amérika ita bele uza karimbu prorrogasaun ba pasaporte”, nia repete.
Governante ne’e esplika, karimbu prolongasaun ba pasaporte bele utiliza to’o loron 20 fulan Maiu tinan 2024. Ida ne’e sei laiha implikasaun ba sidadaun Timoroan ne’ebé hetan prolongasaun ba dokumentu pesoál.
Jornalista sira husu kona-ba trata pasaporte foun, maibé Ministru Justisa la responde, hato’o obrigadu ba jornalista sira hodi kontinua hakat kedas ba karreta laran.
3,280 total views, 6 views today
