DILI—Parlamentu Nasionál (PN) liuhusi plenária, Segunda (27/04/2020) aprova tiha ona autorizasaun ba extensaun deklarasaun estadu emerjénsia husi Prezidente Repúblika Francisco Guterres Lú Olo.
Rejultadu votasaun ba autorizasaun ba deklarasaun estadu emerjénsia, a favor 37, kontra 23, abstensaun 4 no deputadu na’in ida aujente.
Iha lei autorizasaun ne’ebé Parlamentu Nasionál aprova, estadu emerjénsia hahú ba daruak nian iha loron 28/04/2020 iha oras, tuku 00:00 to’o oras 23:59 loron 27/05/2020.
Timor-Leste deklara kazu pozitivu ho COVID-19 iha 21 marsu 2020. To’o loron aplikasaun estadu emerjénsia daruak nian Sentru Integradu Jestaun Krize rejista kazu pozitivu 24 no rekuperadu na’in-6.
Ho aplikasaun estadu emerjénsia parsialmente suspende direitu, liberdade no garantia balun liuhusi kontrolu sanitáriu iha portu no aeropotu, liberdade sirkulasaun, direitu ba reuniaun, manifestasaun no rezisténsia, atividade sosiál no direitu traballadór sei limite atu salva povu nia moris.
Deklarasaun Estadu Emerjénsia sei laiha efeitu ba moris, integridade fízika, kapasidade sivíl no sidadania, la retroativu ba lei penal, defeza ba prosesu kriminal, liberdade ba konsiénsia no relijiaun, la sai sujeitu ba torturasaun, eskravatura, tratamentu kruel, dezumanu no la diskriminativu. (cao)
677 total views, 3 views today
Bele hare Video Seluk :