ATAURO (timorpost.com)- Bainhira Partidu Kongressu Nasionál Rekonstrusaun Timorense (CNRT sigla portugés) ka’er ukun, munisípiu Atauro sei sai zona espesiál, tanba illa Atauro iha biodiversidade ne’ebé riku liu iha mundu.
Prezidente Partidu CNRT, Kay Rala Xanana Gusmão, hato’o kompromísiu politiku ne’e perante militante, simpatizante no apoiante sira, iha mini kampaña ne’ebé realiza iha kampu futebol Villa Maumeta, Tersa (16/05).
Xanana dehan, antes ne’e Governu halo lei ida Atúru tama hamutuk ho Oe-kusi, maibé ikus-ikus ne’e tau fali munisípiu, tau tiha ba munisípiu, maibé la hatene hanoin atu halo saida, ne’e hatudu sira-nia beikten.
Atauro la merese sai munisìpiu, tinan kotuk nia (Xanana) ba to’o iha Atauro ho estudante sira husi universitáriu lubuk ida, hodi haree Baleia iha tasi laran.
Nune’e mós iha tinan kotuk nia (Xanana) ba to’o Lizboa, hodi tuir ONU nia konferénsia boot ida kona-ba tasi azul, iha ne’ebá rai barak temi kona-ba sira nia biodiversidade barak, maibé nia (Xanana) dehan iha Timor-Leste iha illa Ataùru biodiversidade riku liu iha mundu ne’e.
Iha Atauro mós tara ona bandu, ne’e atu haburas tan biodiversidade, tanba ne’e, Atauro la presiza sai munisípiu.
“Lei kria Atauro sai munisípiu ne’e Parlamentu Nasionál mak halo, tanba ne’e kuandu partidu CNRT manan maioria absoluta, lei ne’e so’e ona”, Xanana promete.
Nia esplika, husi peskiza ne’ebé estudante universitáriu sira halo, rekomenda atu hari’i sentru ida iha Atauro, hodi estuda kona-ba biodiversidade, nune’e hanorin ema sira, para hatutan ba rai sira seluk.
“Atauro la presiza sai munisípiu atu dezenvolve an, tanba ne’e ho tara bandu ne’ebé agora funsiona hela iha Atauro, labarik, ferik no katuas sira respeita hela, halo ita-nia riku soin ida biodiversidade ne’e barak liután, ida ne’e mak ita tenke mantein, tanba ita úniku iha mundu, ne’e duni husu ba imi labele estraga arbiru, ida ne’e mak sei lori osan barak mai iha Atauro”, Xanana apela.
Atauro sai zona espesiál ida ho kondisaun biodiversidade ne’ebé mundu sei koñese, tanba ne’e buat ida tau munisípiu ne’e, para habosok populasaun sira, tanba Atauro la presiza sai munisípiu, maibé presiza proteze Atauro ho ninia sasan sira ne’ebé iha fatin seluk laiha, ne’ebé ho nia governu própriu ho kontrola didi’ak husi partisipasaun joven, katuas, ferik no intelektuál sira.
“Kuandu manan tiha, ha’u sei tun mai iha Atauro, mai ko’alia ho imi hodi ita diskute didi’ak atu dezenvolve Atauro ne’e oinsá? tanba Atauro ho kondisaun ida espesiál tebetebes ho biodiversidade ne’ebé riku no kapas liu iha mundu”, Xanana kompromete.
Iha fatin hanesan, Koordenador Partidu CNRT Munisípiu Atauro, José Batista, hatete governu kria Ataùru hanesan munisìpiu espesiál, maibé durante ne’e tratamentu la espesiál, tanba iha Atauro rai rahun suar nafatin, no iha tempu udan tahu nakonu, halo komunidade sira movimentu la di’ak.
Tanba ne’e nia promete, sei servisu hamutuk ho aliadu sira, para partidu CNRT manan maiória absoluta iha munsípiu Atauro, hodi lori Prezidente Partidu CNRT, Kay Rala Xanana Gusmão ba ka’er pasta Primeiru Ministru.
“Iha 2022 liubá, ita hili ona Ramos Horta, tanba Avó Xanana mak apoiu nia ba Prezidente, agora ita hili fali Avó Nana ba Primeiru Ministru”, nia dehan.
Nune’e mós, Prezidente PSD, João Gonçalves, hatete Atauro iha turizmu ne’ebé potensiál boot tebetebes, tasi iha riku soin barak, maibé governu ida ne’e la dezenvolve turizmu iha Atauro, tanba la hatene halo planu no programa.
“Tanba ne’e maluk sira, hela de’it loron hira ona, keta haluha dia 21 agora, vota ba nùmeru-12, para lori maun boot Xanana Gusmão ba Primeiru Ministru, hodi salva ita-nia nasaun no hadi’a povu nia moris”, ekonomista ne’e apela.
Entretantu, iha mini kampaña ne’e hetan mós afiliasaun husi militante partidu KHUNTO ho FRETILIN.
No iha ámbitu mini kampaña refere fiskaliza husi Komisaun Nasionál Eleisaun (CNE sigla portugés), inklui hetan seguransa masímu husi Komandu Polísia Nasionál Timor-Leste Munisípiu Atauro.
11,340 total views, 3 views today
Bele hare Video Seluk :
Subscribe to Timorpost
