DILI—Prezidente Replika Francisco Guterres Lú Olo manda ona karta pedidu ba Parlamentu Nasionál (PN) hodi autoriza nia bele deklara estadu emerjénsia ba fulan ida tan tuir proposta governu nian hodi iha biban luta kontra atake pesti corona (COVID-19) iha territóriu.
Molok manda karta ba PN, iha loron 22/04/2020, Lú Olo konvoka reuniaun ho Membru Konsellu Estadu no Konsellu Superior Defeza no Seguransa (KSDS) no hetan votu unanimidade ba medida ida ne’e ho rajaun atu prevene kalamidade públika ne’ebé mosu husi COVID-19. Estadu halo esforsu hotu-hotu atu proteje nia ema atu la husik moras COVID destroi sidadaun, povu no País. Hafoin enkontru Konsellu Estadu no Konsellu Superior Defeza no Seguransa, Chefe Casa Civil informa kona-ba objetivu estensaun estadu emerjénsia:
“Objetivu ida de’it, Estadu no Governu hadomi nia povu, atu salva povu ne’e husi moras no mate.” sSubliña iha komunikadu husi Palásiu Prezidensial hafoin reuniaun KE-KSDS.
Estadu emerjénsia ne’ebé Prezidente Repúblika deklara iha 27 marsu sei remata iha 26 abril. Tanba ne’e, Governu hatama proposta estensaun estadu emerjénsia atu fó protesaun ba saúde públika iha Repúblika Demokrátika Timor-Leste. Tanba coronavirus nu’udar pandemia nune’e presiza medida preventiva lalais atu la hadaet moras at ne’e babeibeik no hamate ema barak.
Proposta durasaun ba estadu emerjensia husi Governu ba fulan ida tan mak hahú husi 27 abril-26 maiu 2020.
Timor-Leste deklara kazu pozitivu ho COVID-19 iha 21 marsu 2020. To’o 21 abril, Sentru Integradu Jestaun Krize rejista kazu pozitivu 23 no rekuperadu 1, suspeitu 361.
Estadu emerjénsia sei fó kbiit legal ba instituisaun estadu ninian foti medida preventiva no kombate moras COVID-19 ba povu no nasaun tomak nia moris. Ho aplikasaun estadu emerjénsia sei parsialmente suspende direitu, liberdade no garantia balun liuhusi kontrolu sanitáriu iha portu no aeropotu, liberdade sirkulasaun, direitu ba reuniaun, manifestasaun no rezisténsia, atividade sosiál no direitu traballadór sei limite atu salva povu nia moris.
Deklarasaun Estadu Emerjénsia sei laiha efeitu ba moris, integridade fízika, kapasidade sivíl no sidadania, la retroativu ba lei penal, defeza ba prosesu kriminal, liberdade ba konsiénsia no relijiaun, la sai sujeitu ba torturasaun, eskravatura, tratamentu kruel, dezumanu no la diskriminativu. (cao)
569 total views, 3 views today
Bele hare Video Seluk :
Subscribe to Timorpost
