DILI—Primeiru Ministru Taur Matan Ruak, Sexta (17/04/2020) hasoru malu ho Prezidente Repúblika Francisco Guterres Lú Olo iha Palásiu Prezidensiál Nicolau Lobato, Bairro-Pité, Dili, hodi informa assuntu tolu ba Xefe Estadu.
Assuntu dahuluk maka Taur fó agradesimentu ba Lú Olo tanba ofisialmente hakerek ona karta aseitasaun ba nia desizaun retira pedidu demisaun husi kargu Primeiru Ministru governu daualu nian.
“Agradese tanba ha’u retira fali ha’u nia pedidu demisaun, i Sua Exelensia Prezidente Repúblika aseita i fó nia konfiansa tomak ba oitavo governo konsntitusional,” Taur hatete ba Jornalista sira hafoin sorumutu.
Assuntu daruak Taur informa situasaun atual ba Xefe Estadu kona-ba implementasaun estadu emerjénsia durante ne’e no servisu no preparasaun sira ba kombate surtu coronavirus (COVID-19) iha ne’ebé Timor Leste rejista ona kazu pozetivu 18, rekopera na’in-ida. No informa mós kona-ba prosesu sira sosa ekipamentu prevensaun ba tékniku sira iha terrenu hodi hala’o servisu ho seguransa ne’ebé di’ak liu
“Ita hein katak fulan ida ne’e remata ita bele hetan ona ekipamentu sira ne’e para fó kbiit liu tan ba ita nia tékniku sira par abele servisu,”
No assuntu ikus ne’ebé Taur ho Lú Olo diskuti kona-ba tetu sira ba extensaun estadu emerjénsia hodi fó biban ba estadu atu halo jestaun ba krize surtu COVID-19.
“Osida (17/04/2020) ami sei iha reuniaun konsellu interministerial kona-ba jestaun de krize para haree posibilidade extensaun ou lae kona-ba situasaun de emerjénsia nian,” Taur subliña.
Entretantu Taur ho Lú Olo mós diskuti kona-ba meius sira governu nian ba rekoperasaun ekonomia iha rai laran durante krize nia laran. Liuliu stok aihan ba populasaun sira.
“Kona-ba foos, iha fulan Marsu, ita iha foos naton para augenta fulan tolu haat nian. Ba fulan Abril ita nia stok menus, maibé ne’e tanba ita nia populasaun sira hola foos ba rejerva iha uma,” Taur dehan. (cao)
680 total views, 9 views today
Bele hare Video Seluk :