DILI—Komisaun Anti Korrupsaun (KAK) notifika lider supremu partidu Kmanek Haburas Unidade Nasionál Timoroan (KHUNTO), José dos Santos ‘Naimori Bucar’ ba krime intervensaun autoridade publika, ne’ebé previstu iha artigu 242 Kódigu Penal Timor-Leste.
Advogadu Privadu Partidu KHUNTO, Ismael Assunção, hatete kazu osan iha aeroportu, bainhira pesoál KHUNTO lori atu ba sosa atributu partidu nian, maibé autoridade seguransa sita, entaun iha momentu deskonfia dehan lider supremu partidu KHUNTO halo intervensaun ba autoridade publika.
Tanba ne’e mak Ministériu Públiku (MP) delega kompeténsia ba Komisaun Anti Korrupsaun, hodi notifika lider supremu partidu KHUNTO ba krime Intervensaun Autoridade Publika (IAP).
“Sira suspeita ha’u-nia kliente ho krime intervensaun autoridade públika artigu 242 Kódigu Penal, katak altura ne’ebá autoridade públiku halo hela nia servisu, dehan ha’u nia kliente ba halo intervensaun, mais iha altura ne’ebá situasaun la prevee”, nia informa ba jornalista sira iha Tribunal Distritál Dili, Sesta (14/04).
Nia dehan, nia parte marka prezensa iha KAK hodi reprezenta ninia kliente, tanba KAK notifika ninia kliente atu ba presta deklarasaun iha loron Sesta (14/04), maibé baihira advogadu ba halo konfirmasaun, investigadór KAK ne’ebé kaer prosesu ne’e iha hela kondisaun moras, nune’e labele realiza investigasaun, entaun KAK adia fali ba loron seluk sein data determinadu.
“Ha’u-nia kliente prontu ona atu dezloka ba KAK, maibé KAK rasik mak komunika katak, la presiza kliente atu ba, so mandatariu legal sira mak bele lori fali karta notifikasaun ne’ebé antes ne’e KAK notifika, tanba ida ne’e mak ami-nia prezensa iha KAK”, nia afirma.
Nia admite, lider supremu partidu KHUNTO koopera nafatin, tanba hanesan sidadaun nafatin koopera ho autoridade sira, para atu buka lia loos ba kazu sira hanesan ne’e.
“Ha’u-nia kliente nia pozisaun hanesan suspeitu ka lae, ne’e prezunsaun inosénsiu, tanba foin mak atu ba suspeitu. Dezde iha ne’ebé kedas, ha’u nia kliente sempre prontu hela de’it”, nia subliña.
Entretantu, antes ne’e advogadu privadu partidu KHUNTO ne’e, hatete Ministériu Públiku liuhusi prokuradór titulár hatún despaxu ba Banku Sentrál Timor-Leste (BCTL), hodi autoriza devolve osan $130.000 husi partidu KHUNTO ne’ebé parte autoridade seguransa no autoridade aduaneira alfándega halo aprensaun iha Aeroportu Internasionál Nicolau Lobato Komoro, tanba la prienxe rekizitu ba krime brakamentu kapitál.
Ismael dehan, hafoin Ministériu Públiku rona tiha parte hirak ne’ebé sai hanesan interveniente ba prosesu, liuliu ba ema hirak ne’ebé sai hanesan suspeitu ba kazu lori osan ho montante $130.000, Ministériu Públiku nu’udar na’in ba asaun penál tuir lei Kódigu Penál artigu-49, MP maka bele halo promosaun no halo akuza.
Nune’e Ministériu Públiku hafoin valida tiha prosesu osan $130.000, no rona tiha suspeitu ne’ebé lori osan ne’e nian deklarasaun, Ministériu Públiku haree no entende katak ba prosesu osan $130.000 ne’e la prienxe rekizitu ba krime brankamentu kapitál.
Osan ne’e partidu KHUNTO nian, hasai iha banku hodi lori ba hola atributu partidu nian, hodi prepara ba atividade partidu nian iha tinan 2023, maibé osan refere konsiderasaun la hetan koñesimentu husi Banku Sentrál Timor-Leste (BCTL) no viola lei brankamentu kapitál, tanba lori osan ho montante boot la informa ba BCTL.
“Ministériu Públiku nu’udar na’in ba asaun penál, hafoin valida tiha prosesu osan 130.000, nune’e Ministériu Públiku haree no entende katak ba prosesu osan ne’e la prienxe rekizitu ba krime brankamentu kapitál”, advogadu privadu ne’e deklara ba jornalista sira liuhusi konferénsia Imprensa, iha Hotel Timor, Kinta (19/01).
2,073 total views, 3 views today
Bele hare Video Seluk :