DILI—Prokuradór Jerál Repúblika (PGR), Alfonso Lopes, afirma maiske laiha Komisáriu, maibé servisu Komisaun Anti Korrupsaun (KAK) nian funsiona normal.
Nia dehan, atu hili Komisáriu foun KAK, kompeténsia iha Parlamentu Nasionál, maibé atividade instituisaun refere nian la’o nafatin.
“Ita hatene lei KAK tantu Ministériu Públiku, maski seidauk nomeadu, mais servisu la’o nafatin tanba iha investigadór sira, KAK ne’e polisia espesializadu ba Korrupsaun nian, entaun sira sempre hala’o sira nia papél investigasaun parseria ho Prokuradór sira, mezmu komisáriu la iha”, Alfonso informa ba jornalista sira, hafoin halo abertura ba formasaun Majistradu Ministériu Públiku, iha Sentru Kulturál Embaixada Portugal, Kinta (13/04).
Nia hatete, maski seidauk iha Komisáriu foun, maibé daudaun ne’e sei iha diretór KAK, para atu hala’o servisu.
“Ohin dadeer Diretór husi KAK hala’o reuniaun ho Adjunta Prokuradór Jerál Repúblika, signifika servisu la’o nafatin, laiha difikuldade, maibé di’ak iha Komisáriu foun, mais ida ne’e kompeténsia Parlamentu Nasionál nian”, nia afirma.
Nia admite, KAK kontinua funsiona nafatin, tanba iha estatutu Ministériu Públiku nian, katak KAK atu halo investigasaun ba kazu sira ne’ebé titular asaun penal Ministériu Públiku delega ba, tanba ne’e KAK labele husik kualkér saida de’it mak Ministériu Públiku submete ba KAK halo investigasaun, kuandu husik no rai de’it iha gaveta, tenke hetan sansaun dixiplinár.
“Maibé ha’u hakarak hateten katak kazu sira ne’ebé mak Ministériu Públiku delega ba iha KAK, prosesu investigasaun kontinua la’o nafatin, tuir nia prazu ne’ebé mak iha, maibé kuandu husik no rai de’it gaveta no husik de’it, tenke hetan sansaun dixiplinár”, nia subliña.
Iha sikun seluk, Diretór Ezekutivu Asia Justice and Rights (AJAR), José Luis de Oliveira, afirma Komisaun Anti Korrupsaun hanesan instituisaun estra judisiál, tanba instituisaun judisiál loloos mak Tribunal, Ministériu Públiku no Defensoria Públika.
Nia konsidera ezisténsia Komisaun Anti Korrupsaun nian fó prejuizu ba estadu, inklui prejuizu ba funsionamentu Ministériu Públiku atu prosesa kazu korrupsaun ne’ebé ho efetivu.
“Ita inventa extra judisiáriu, judisiál loloos ne’e mak Tribunál, Ministériu Públiku no Defensoria Públika, KAK ne’e estra judisiál”, nia informa ba jornalista sira iha kna’ar fatin Faról, Kuarta (12/04).
Nia dehan, instituisaun extra judisiál ne’e instituisaun ida provizóriu, la’ós permanente, instituisaun extra judisiál ne’e eziste kuandu situasaun Estadu nesesidade, bainhira normal Estadu nian la funsiona ho didi’ak.
“Agora ita seidauk optimaliza órgaun regular sira hanesan Ministériu Públiku, ita inventa tiha ona instituisaun ida depois kria konfuzaun. KAK nia ezisténsia mai ho regalia ne’ebé mak as liu Ministériu Públiku, maibé entermus iha kompeténsia Ministériu Públiku mak as liu fali KAK, ida ne’e kria konfuzaun”, nia afirma.
1,283 total views, 3 views today
Bele hare Video Seluk :