DILI—Líder Nasionál Kayrala Xanana Gusmão durante semana hirak nia laran lidera ekipa voluntáriu ida hodi halo preparasaun ba fatin kuarentena ho kuartu hamutuk atus tolu iha sidade nasaun nia rohan ba parte loromonu Tasi Tolu, Dili.
Xanana organiza inisiativa ne’e nu’udar sidadaun ida ne’ebé tenke partisipa ativu ho kbiit hotu iha luta ba funu foun kontra atake pesti corona alias COVID-19 ne’ebé kuaze fulan haat nia laran hamate ona ema kuaze rihun rua iha mundu, liuliu iha Amérika, Itália, España, no nasaun hotu iha mundu inklui Timor Leste rejista ona kazu neen.
Tuir observasaun Timor Post iha loron 14/04/2020 haktuir, Xanana ba halo observasaun ba fatin kuarentena ne’ebé atinje ona pursentu 95 ne’e. no oriente ekipa iha terrenu inklui Diretór Jerál Ajénsia Dezenvolvimentu Nasionál, Samuél Marçal atu tau atensaun ba kualidade no distánsia sosiál.
Tuir planu, Xanana ho nia ekipa sei entrega fatin kuarentena ne’e ba governu lideradu Primeiru Ministru Taur Matan Ruak (TMR) liuhusi Sentru Integradu Jestaun Krize (SIJK) hodi uza ba koloka timoroan sira ne’ebé tenke tama kuarentena liga ho COVID-19.
Aleinde preparasaun iha Tasi Tolu tanba ho hanoin sees uitoan husi sidade, Xanana ho nia ekipa mós halo preparasaun iha ospitál antigu iha Lahane, Dili hodi entrega ba governu utiliza. (cao)
666 total views, 3 views today
Bele hare Video Seluk :
Subscribe to Timorpost
