DILI—Iha desizaun Konsellu Ministru, Kuarta (12/04), aprova projetu dekretu-lei ne’ebé aprezenta husi Vise-Primeiru-Ministru no Ministru Planu no Ordenamentu, José Maria dos Reis, kona-ba Planu Nasionál Ordenamentu Territorial (PNOT-TL).
Ministru Prezidénsia Konsellu Ministru, Fidelis Manuel Leite Magalhães, hatete, PNOT- TL hanesan ezersísiu dahuluk husi planeamentu territoriál ba nivel nasionál ne’ebé realiza ho enkuadramentu legál no institusionál ne’ebé adekuadu, haree promosaun ba modelu ida dezenvolvimentu nasionál sustentavel no inkluzivu.
“Planu ne’e sei aplika ba territóriu tomak Timor-Leste nian, inklui mós ba rejiaun Oekusi Ambenu no illa sira Ataúru no Jaco, ho área ida-ne’ebé hamutuk 14.919 km² no governa husi prinsípiu sira partisipasaun nian, subsidiariedade, prevensaun, prekausaun, ekuidade ka solidariedade sosiál, efisiénsia ambientál no sosiál,” nia dehan iha Palasiu Governu.
Iha projetu lei ne’e propoin medida planeamentu 61 no asaun sira hamutuk 117 ne’ebé sei implementa iha domíniu Lima kompostu hosi ambientál, rede urbana no povoamentu rurál, produtivu, infraestrutura no ekipamentu sira no institusionál organizasionál.
PNOT-TL hanesan instrumentu dezenvolvimentu territoriál ida-ne’ebé estabelese ba opsaun boot sira hodi organiza territóriu nian, ho objetivu atu promove dezenvolvimentu integradu ida, armoniozu no sustentavel ba país, atu garante koezaun territoriál no atu hamenus asimétrika territoriál sira.
Ho objetivu mós atu haforsa territóriu hanesan fatór integradu ba polítika sira setoriál nian no orienta polítika territoriál eskala ki’ik sira.
Planu Nasionál Ordenamentu Territóriu nian sei konstitui hanesan instrumentu-xave hodi estabelese sustentabilidade ba baze sira dezenvolvimentu sosiál, territoriál no ekonómiku Timor-Leste nian.
Promove integrasaun setór sira hanesan saúde, edukasaun, komunikasaun, transporte sira, ba enerjia no ba ekonómika nasionál, hadi’a sistema dezenvolvimentu urbanu no rurál, ba nivel nasionál, munisipál no lokál, ho konsiderasaun ba dimensaun ambientál.
Adia Aprovasaun PA Foun
Entretantu, tanba la prienxe kuorum, nune’e prosesu deliberasaun ba aprovasaun proposta governu nian kona-ba planu atu harii postu administrative foun adia ba semana oin.
Vise Ministru Administrasaun Estatál (MAE), Lino de Jesus Torrezão, hatete, planu harii postu administrativu foun ne’e iha munisípiu rua kompostu hosi Munisípiu Baukau no Likisá.
“Horisehik ami aprezenta ona postu tolu, iha Baukau Kelikai rua, Likisá Maubara ida, Maubara temi postu Loes, Kelikai ne’e postu Antigu no Postu Laisurulai iha ona, hein atu halo deliberasaun hodi aprova maibé la konsege tanba la prienxe kuorum, parese tersa mai ne’e mak bele aprova,” nia dehan iha Palasiu Governu, Kuarta (12/4).
Nia hatete, proposta kona-ba planu harii postu foun tolu ne’e presiza hetan aprovasaun iha jeneralidade no iha espesialidade nune’e maka foin bele estabelese postu hirak ne’e. enkuantu ba suku sira sidauk, tanba ida ne’e kompeténsia diploma ministerial.
Antes ne’e iha reuniaun konsellu aprova mós projetu Proposta Lei, alterasaun datoluk ba Lei nu. 11/2009, loron 7 fulan-outubru, kona-ba Divizaun Administrativa Territóriu ne’ebé aprezenta husi Ministru Administrasaun Estatal, Miguel Pereira de Carvalho.
Aprovasaun ba projetu proposta lei nee, proposta prinsipál mak atu fahe postu Administrativu iha munisípiu rua Likisá no Baukau, iha Likisá postu Maubara sei fahe tan postu foun ida mak Loes, Baukau postu Kelikai sei aumenta postu rua.
Elementu maka kriasaun postu foun, munisípiu Likisá liuliu iha postu Maubara, sei aumenta tan postu ida mak postu administrativu Loes nee ba postu administrativu ida, Maubara iha Loes sei sai postu foun.
“Iha Postu Administrativu Kelikai sei aumenta tan postu rua hamutuk postu tolu, postu ida maka naran postu Kelikai-Kelikai, postu ida hanaran Kelikai Antiga depois mai fali maka postu Matebian”, Ministru Prezidénsia Konsellu Ministru Fidelis Leite Magalhães, aprezenta iha Palacio do Governu Kuarta (15/03).
Projetu Proposta Lei ne’e ho objetu kriasaun sirkunkriasaun administrasaun foun tolu ka eskalaun daruak, ne’ebé rezultadu hotu-hotu husi prosesu desizaun postu administrativu sira daudaun ne’e eziste.
Aliterasaun dahuluk hala’o iha postu administrativu atuál Maubara, iha Munisípiu Likisá, ne’ebé inklui área besik 264 km2, korresponde 48, % husi territóriu munisípiu no populasaun besik ema rihun 22, nune’e postu administrativu ne’e fahe ba rua: Maubara ne’ebé hela ho área 132km² no populasaun hamutuk 12.194; no Loes hela ho área 132 km² no populasaun besik ema 9.700.
Aliterasaun daruak hala’o iha postu administrativu atuál Kelikai, iha Munisípiu Baukau, ne’ebé inklui área besik 13, 7% husi territóriu munisípiu no populasaun besik 17.471.
Nune’e, postu administrativu ne’e fahe ba tolu; Kelikai hela ho área 46 km² no abitante hamutuk 7.096, Kelikai Antiga hela ho área 80 km² no populasaun besik 5.998; no Matebian ho área 80 km² ho abitante besik 4.300.
2,766 total views, 3 views today
Bele hare Video Seluk :
Subscribe to Timorpost
