DILI—Timor Leste deklara tan kazu foun virus corona (COVID-19) na’in rua iha loron 13/04/2020 hafoin iha loron 10/04/2020 rejista timoroan dahuluk pozetivu ida no iha loron 21/03/2020 deklara kazu dahuluk sidadaun estranjeiru ida.
Nune’e, Timor Leste rejista kazu haat. Husi total ne’e atualmente pasiente ne’ebé tama ona iha sala izolamentu timoroan na’in tolu ne’ebé sa’e hamutuk karreta husi Kupaun ba Dili, no estranjeitu rekopera ona.
“Kolega na’in rua ne’ebé pozetivu ne’e sira tama iha grupu ida ho kolega ne’ebé pozetivu uluk ne’e. Sira halo viajen husi Kupang mai Batugade, sira na’in ualu iha Tavel ida. Entaun sira na’in rua ne’e inklui ida ne’ebé hetan pozetivu uluk ne’e,” Porta-Vóz Servisu Intergradu Jestaun Krize (SIJK), Odete Maria Viegas haktuir iha Sala de Situasaun, CCD, Segunda (13/04/2020).
Husi Travel ne’ebé mai husi Kupaung, to’o iha Batugade ema na’in ualu, no husi Batugade to’o iha Dili sira sa’e Bis Maliana nian. Iha Bis laran ne’e hamutuk ema na’in 25, ne’e la inklui kondutor ho ajudante rua.
“Maibé atu hatete katak, kazu rua pozetivu ne’e hamutuk ona iha Vera Kruz. Purtantu iha Vera Kruz pasiente tolu ona maibé atu hatete katak sira nia kondisaun di’ak. Isin manas laiha, mear mós komesa laiha ona. Signifika sira iha observasaun iha médiku jerál na’in rua mak haree no infermeiru i mós espesialista ne’ebé dedikadu duni ba iha kazu ida ne’e,” Doutora Odete haktuir.
“Ba maluk sira ne’ebé mai hamutuk ho sira, agora hela iha Hotel Katuas, ami hasai hotu textu i sei fó sai rejultadu pozetivu ka negativu (kleur liu iha loron 14/04/2020),” Doutora Odete hatutan.
Entretantu Porta-Vóz SIJK ne’e informa, total kuarentena 543, husi total ne’e fahe ba rua, konfinamentu obrigatóriu iha Dili de’it hamutuk 524, iha munisípiu sira iha 113 pesoal, total 637 pesoas. Auto kuarentena númeru hahú ki’ik, iha Dili ema na’in ida no munisípiu ema na’in lima inklui sira ne’ebé tama territóriu klandestinamente no asegura hela iha Maliana.
Kazu rejistadu, suspeitu hamutuk ema na’in-168, sei hein rejultadu teste 53, kazu konfirmadu na’in haat. Husi númiru ne’e, na’in ida nu’udar sidadaun estranjeiru rekopera ona, pozetivu foun na’in-tolu inklui na’in-ida tama izolamentu iha loron 10/04/2020, no na’in rua iha loron 12/04/2020. (cao)
537 total views, 3 views today
Bele hare Video Seluk :
Subscribe to Timorpost
