DILI-Prezidente Autoridade Munisípiu haat kompostu hosi Ermera, Bobonaru, Baukau no Manatutu hato’o sira nia preokupasaun ba Komisaun Funsaun Públiku (KFP).
Prezidente Autoridade Munisípiu Bobonaru, Ernesto de Oliveira Barreto, hatete, enkontru ho KFP hodi hato’o preokupasaun balun relasiona ho funsionáriu públiku sira iha munisípiu iha loron Sábadu ho Domingu uza patrimóniu estadu hodi hala’o atividade família nian.
“Ami nia enkontru ne’e hodi hato’o ami nia preokupasaun no ami nia observasaun ba funsionáriu sira iha munisípiu ne’ebé utiliza patrimóniu estadu nian iha loron feriadu hodi uza karreta ba atividade privadu duke interese komún”, Ernesto hateten liuhosi nia intervensaun iha enkontru hamutuk ho KFP iha salaun MF Ai-tarak Laran, Segunda (20/03).
Nia dehan, tuir loloos funsionáriu públiku labele utiliza karreta estadu iha loron Sábadu ho Domingu, tanba servisu laiha, maibé kona-ba profesór ne’ebé hanorin estudante iha loron Sábadu sira bele uza karreta ka motor estadu nian hodi halo viajen ba-mai, tanba distánsia dook.
Iha fatin hanesan, prezidente Autoridade Munisípiu Ermera, Eusébio Salsinha, hatete, tuir loloos funsionáriu públiku sira uza patrimóniu estadu nian iha oras servisu nian iha loron Segunda to’o Sesta enkuantu loron Sábadu ho Domingu karreta refere ba para iha edifísiu ida-idak hodi nune’e funsionáriu labele uza ba sira nia interese privadu.
Nia dehan, papél diresaun patrimóniu estadu no Komisaun Anti Korrupsaun (KAK) iha kompeténsia tomak hodi kontrolu ba ministériu ida-ida iha loron Sesta karreta tenke para iha edifísiu ida-idak atu nune’e funsionáriu sira labele uza karreta estadu nian ba sira nia interese privadu duke interese komún.
Iha sorin seluk, prezidente Autoridade Munisípiu Baukau, Domingos Freitas, preokupa kona-ba funsionáriu públiku ne’ebé servisu maka hela iha munisípiu sira uza patrimóniu estadu maka viajen mai iha Dili iha loron Sábadu ne’e sira sala ka los.
“Tanba ne’e ami husu esplika di’ak atu nune’e funsionáriu públiku ne’ebé hela iha munisípiu hodi hatene karreta estadu nian utilizasaun ne’e iha loron saida hodi nune’e sira bele hatene hodi utiliza tuir lei haruka”, nia hakotu.
1,187 total views, 6 views today
Bele hare Video Seluk :
Subscribe to Timorpost
