DILI-Ambiente real, dezde Prezidente Repúblika dekreta estadu emerjénsia iha loron (27/03) no implementa iha loron 28/03 fó impaktu maka’as tebes ba rendimentu povu ki’ik sira, liuliu negosiante ne’ebé baibain fa’an modo iha Merkadu Komoro no situasaun ida ne’e afeta tebes ba sira nia ekonomia uma laran.
Negosiante Modo Maria da Silva, hatete durante implementasaun estadu emerjénsia ne’e, nia ladún hetan rendimentu tanba maioria komunidade la halo movimentu tanba surtu COVID-19 ne’e, ne’e prejudika tebes ba ninia rendimentu kompara ho situasaun normal.
“Modo agora ema hola la iha, agora de’it hosi ohin dadeer san to’o meiudia fa’an foin mak hetan 5 dollar de’it, kuandu situasaun baibain, loron ida bele hetan 50 dollar sorte di’ak mak 60 to’o 100 dollar liu,” Nia dehan ba Timor Post, iha Merkadu Komoro, kuarta (08/04).
Hatutan nia, iha situasaun baibain sasán folin tebes maibé tama ona ba estadu emerjénsia sasán hotu la folin tanba ema mai hola la hanesan baibain tanba ema sira mai sosa ne’e menus.
Nia sente triste ba situasaun ida ne’e tanba la iha ona kapasidade atu sustenta uma laran liuliu labarik sira nia presiza ne’e labele ona tanba rendimentu menus liu la hanesan baibain.
“Sente triste maibé atu halo oinsá loos, ida ne’e desizaun estadu nian mós di’ak ba ita hotu tanba moras refere la di’ak ba ita nia vida bainhira kona ita más nesesidade uma laran mak arraska tanba rendimentu la hanesan loron baibain I labarik sira nia nesesidade ou presiza ita labele ona atende,” Afirma nia.
Parte seluk, negosiante ambulante Antonio (Ano) ba Timor Post iha Bekora, situasaun baibain bele lori modo to’o hetan dollar 50 ba leten depois de tama ba estadu emerjénsia dala ruma loron ida hetan de’it dollar 20 nune’e afeta tebes ba nesesidade ekonomia uma laran.
“Ha’u baibain iha situasaun normal dudu karrosa ba fa’an modo bele hetan 60 to’o 80 dollar hanesan ne’e, más agora dudu karrosa tama sai bairru hetan de’it 40 dollar kadavés hetan 20 dollar, ida ne’e sente triste tanba nesesidade uma laran labele aguenta ona tanba hetan osan uitoan de’it,” Nia hatete.
Nune’e ikus nia informa, sorte aluga uma ne’e ami na’in 3 kolega tau osan hamutuk selu I dala ruma modo ohin loron ema la sosa hotu obriga ami tenke soe tanba la iha jeleira hodi tau nune’e modo nafatin fresku para aban kontinua ba fa’an. (MJ4)
1,001 total views, 9 views today
Bele hare Video Seluk :