DILI (timorpost.com)-Partidu CNRT submete ona lista ba Tribunal Rekursu hodi komplete rekezitu legal ida hodi partisipa iha festa demokrasia eleisaun paramentar.
“Ohin tuku 3 liu minute 15 partidu CNRT submete ona lista kandidatus fetivus 65 ho supliente 25 tuir lei haruka,” hatoo husi tékniku nasional partidu CNRT Joãozito Viana ba jornalista hafoin submete lista kandidaturas partidu CNRT ba iha Tribunal Rekursu, kuarta (15/03/2023).
enkuantu oras balaun antes, Prezidente Tribunal Rekursu (PTR), Deolindo do Santos, informa partidu hitu mak alista ona iha Tribunal Rekursu, hodi kompete iha eleisaun parlamentár.
“Ate agora partidu polítiku sira neebé hatama lista kandidatura mai iha Tribunal Rekursu nee iha 8, husi lista ualu nee, finalmente tribunal rekursu deside koligasaun ida mak la admite, lista kandidatura husi partidu 7 mantein nafatin”, nia informa ba jornalista sira iha knaar fatin Kaikoli, Kuarta (15/03).
Nia dehan, iha loron Kuarta (08/03), tribunal simu lista husi partidu Frente Mudansa, no iha loron Kinta (09/03) koligasaun ADN, maibé tribunal la admite.
Alende nee, iha loron Segunda (13/03), tribunal simu lista husi partidu tolu, hanesan MLPM, UNDERTIM ho PST, no iha Tersa (14/03) tribunal simu lista rua husi PLP no HKUNTO, ikus liu mak PLPA neebé hatama iha loron Kinta (15/03).
“Husi ida nee, hatudu katak partidu lubuk boot ida, sira neebé mak asentu parlamentár, no mós laiha asentru parlamentár, mais too agora hela deit oras neen ona, barak mak seidauk hatama lista kandidatura mai”, nia afirma.
Nia husu ba interesante partidu polítiku sira, tenke ser lori ona lista ba tribunal rekursu, tanba hela deit ona oras 6, tuku 5 lokraik hotu ona, liu ida nee la admite ona tuir lei númeru 16/2017, 12 Maiu.
852 total views, 3 views today
