DILI (timorpost.com)-Prezidente Parlamentu Nasionál (PPN), Aniceto Longuinhos Guterres Lopes, reprezenta Prezidente Repúblika, hodi lidera loron nasionál Veteranu, ne’ebé konsidera hanesan auto-rekonesimentu ba lala’ok sidadaun hotu nian.
PPN ninia diskursu hatete, komemorasaun ne’e kada tinan komemora nafatin, nu’udár momentu reflesaun auto-rekonesimentu ba hothotu ninia lala’ok no ba Veteranu hotu ninia lala’ok iha era ukun-rasik-an.
“Momentu ne’e la’ós jestu serimonial de’it, mais tenke hatene ita nia realidade sosiál, ekonomia no polítika ne’ebé ita hakata too ona tinan 20,” deklara liuhosi ninia diskursu ba loron Veteranu, ne’ebé selebra iha Palasiu Governu, Sesta (03/03).
Valor ne’ebé lori atu reziste iha tempu rezisténsia, sei relevante no sei iha sentidu atu mantein realiza iha era ukun-rasik-an ne’e.
“Komemorasaun ba tinan ida ne’e, ita halo ho tema hametin unidade ba dezenvolvimentu nasionál, nu’udár jestu ida atu prezerva kultura no istoria kona-ba rezisténsia nian”, nia hateten.
Iha komemorasaun ne’e, atu fó omenajen ba eroi hotu-hotu, tantu feto no mane, hanesan komandante no eis Prezidente Repúblika, Nicolau dos Reis Lobato, komandante Nino Konis Santana, Maria Talo, Rosa Muki Bonaparte, inklui eroi hotu ne’ebé fó an tomak ba luta livertasaun nasional no independesia Timor-Leste.
Veteranu hotu nu’udár ema ne’ebé iha korajen determinadu ho firmeza no desididu, atu fó solusaun ba situasaun kritiku ida ba interese ema barak nian.
“Ita luta ba libertasaun pátria, através faze sira ne’ebé kritiku tebes, nakonu ho susar oi-oin ne’ebé dedikadu no kompleksu tebes”, nia rekonese.
Situasaun sira hanesan ne’e mak fó biban hodi hahoris fali veteranu no eroi sira, atu kontinua lidera funu hasoru okupasaun militar Indonézia ho finalidade ida atu hetan vitiria ba Timor-Leste nia independensia.
“Lorin ida ohin, ita hanoin hikas ita nia veteranu no eroi sira iha asaun koletuvu hamutuk ho povu, povu ne’ebé sustensia ezistensia mós sai eroi hotu”, nia dehan.
Tanba independesia atinje liuhosi obra koketiva no kolabitariva, ne’ebé sustenta ho valor lubuk ida.
1,025 total views, 3 views today
Bele hare Video Seluk :