Dili (timorpost.com)—Failansu Governu rezolve problema rai harii eskola São Miguel la iha, impede servisu haluan estrada diresaun rua husi uma adat Tasi-tolu mai Rotunda Prezidente Nicolau Lobato paradu.
Tuir observasaun Timor Post iha terenu, Kinta, (02/03), nota katak tékniku sira loke estrada diresaun rua (dua jalur) no fui ona alkatraun husi uma adat to’o de’it iha rai kotu paradu tiha.
Enkuantu kontinuasaun estrada husi Rai kotu mai to’o Rotunda Prezidente Nicolau Lobato Komoro seidauk bele book, tanba governu rasik seidauk rezolve rai harii edifísiu eskola São Miguel nian.
Tanba ho problema sira ne’e, maski konstrusaun haluan estrada diresaun rua husi Uma Adat Tasi-tolu mai to’o Rotunda Prezidente Nicolau Lobato, finansia husi orsamentu emprestimu ho pakote ida de’it, maibé kuaze tinan ida resin ladauk finaliza.
Relasiona servisu paradu ne’e, Timor Post antes ne’e konfirma ona Ministru Obras Públika, Abel Pires, rekoñese katak, projetu konstrusaun haluan estrada diresaun rua ne’e seidauk kontinua tanba resposta klaru ba rai harii edifísiu eskola São Miguel seidauk iha.
“Ita boot sira hatene projetu imprestimu konstrusaun haluan estrada diresaun rua husi Tasi-tolu mai rotunda Prezidente Nicolau, agora daudauk iha fatin eskola São Miguel maka seidauk bele rezolve, ne’ebé ita hein ida ne’e, tékniku sira sei ba ko’alia”, dehan Ministru MOP, Abel, bainhira partisipa reuniaun konsellu ministru iha Palasiu Governu, Kuarta, (01/03).
Maibé, em prinsípiu estrada diresaun Tasi-tolu to’o Rotunda Prezidente Nicolau Lobato Komoro ne’e di’ak hela, laiha urjénsia para atu hadi’a lalais. Ne’ebé la hadi’a lalais mós laiha problema. (*)
1,534 total views, 3 views today
Bele hare Video Seluk :
Subscribe to Timorpost
