DILI—Eis Primeiru Ministru nu’udar membru husi Sentru Integradu Jestaun Krize (SIJK) COVID-19, Doutór Rui Maria de Araújo, husu deskulpa ba públiku relasiona ho informasaun ne’ebé nia rasik fó sai ba públiku iha loron Kuarta (01/04/2020) kona-ba loron Timor Leste anúnsia kazu ida husi virus corona (COVID-19).
Liuhusi konferénsia ba imprensa iha loron Kinta (02/04/2020) iha sala SEJK, Doutór Rui klarifika, loron ne’ebé Timor Leste anúnsia la’ós hanesan nia hatete antes iha 21 Fevereiru, maibé iha loron 21 Marsu 2020.
“Husu deskulpa. Maibé kazu konfirmadu ne’ebé anunsia iha dia 21 de Marsu, la’ós 21 de Fevereiru,” Doutór Rui klarifika.
Entretantu iha okajiaun Doutor Rui informa, hahú husi ne’eba to’o loron ne’ebé nia hala’o konferénsia ba imprensa rejista suspeitu ba COVID-19 hamutuk 35. Husi númeru ne’e hafoin halo análiza ba rejultadu teste sei nafatin ida mak pozetivu.
Nune’e mós nia esplika, husi númeru ne’e, negative iha na’in 24 no provavel ka sei hein rejultadu análiza ou laiha kondisoens para atu halo análiza hamutuk na’in-10.
Iha oportunidade Doutór Rui mos halo esplikasaun kona-ba termu “suspeitu” katak, ema ne’ebé mai husi fatin afetadu ka ema ne’ebé iha kontaktu ho kazu konfirmadu ne’ebé hatudu sintomas de infesaun respiratorias aguda hanesan isin manas, mear, kakorok moras no seluk tan.
Maske ho dadus ne’ebé fó sai, iha loron hanesan, Ministra Saúde Interina no Vise Ministra ba Kuidadu Saúde Primária, Élia Antonia dos Reis Amaral, fó sai dadus diferente katak hahú husi loron Timor Leste anúnsia kazu ida, to’o loron 02/04/2020 suspeitu hamutuk 23, pozetivu nafatin na’in ida iha faze rekoperasaun.
Élia defende katak, SIJK nu’udar ekipa tékniku ne’ebé hala’o de’it servisu, maibé informasaun hotu-hotu tenke fó sai ofisialmente husi Ministériu Saúde.
“Ba iha asuntu tékniku ami mak apoiu ida ne’e sei responsabilidade ba ida ne’e, hanesan mós ha’u hatene ona katak, konsidera ba iha Laboratóriu Nasionál ne’ebé mak hola parte ba iha Ministériu Saúde no ha’u mak relata informasaun ne’ebé mak iha. No dadus sira ne’e tenke foti husi Ministériu Saúde, ida ne’e mak importante liu.” Élia subliña.
Maske nune’e, iha parte seluk, Sekretáriu Estadu Komunikasaun Sosiál (SEKOMS) Mericio Akara konsidera asaun husi Ministra Saúde Interina no Vise Ministra ba Kuidadu Saúde Primária, Élia Antonia dos Reis Amaral fó informasaun ba públiku ne’e individuál.
“Legalmente situasaun emerjénsia agora komandu direita husi primeiru ministru. Laiha tan komandu A ou B, instrusaun ba ema ida (Dr. Rui Araújo) atu fó sai informasaun, ida agora MS ne’e asaun individual,” Akara afirma kestaun ne’e hafoin konferénsia imprensa ho dadus la hanesan ne’ebé fó sai husi Ministra Interina Élia ho Membru SIJK Rui Araújo.
Akara hatete, Governu lideradu Primeiru Ministru Taur Matan Ruak (TMR) estabelese tiha ona SIJK lidera rasik husi Primeiru Ministru. Nune’e, nia dehan, gabinete husi SIJK maka iha kompeténsia tomak atu anunsia informasaun ba públiku.
Tuir observasaun Jornalista Timor Post, situasaun iha salaun sentru mídia ba COVID-19 iha CCD, iha loron hanesan lori minutu de’it mosu konferénsia ba imprensa husi autoridade na’in tolu ho asuntu hanesan maibé dadus la hanesan.
To’o notísia ne’e públika Timor Post seidauk hetan konfirmasaun husi Primeiru Ministru Taur Matan Ruak kona-ba sé mak iha liu kompeténsia atu anunsia informasaun kona-ba COVID-19 iha Timor Leste ba públiku liuhusi mídia.
Estrutura SIJK
Entretantu Primeiru-Ministru iha loron 31/02/2020 despaisu ida, númeru 015/PM/III/2020, hodi nomeia estrutura ba SIJK mak hanesan tuir mai:
1. Brigadeiru Jenerál, João Miranda “Aluk”, atuál Diretór CIGC nu’udar 2º Komandante Operasionál.
2. Kapitaun Mar e Guerra, Pedro Klamar Fuik atuál Diretór Institutu Defeza Nasionál (IDN), nu’udar Estadu Maiór Koordenadór
3. Sérgio Lobo, Eis Ministru Saúde, nu’udar Koordenadór ba Forsa Tarefa ba Prevensaun no Mitigasaun ba Pandemia Covid-19.
4. Rui Maria de Araújo, eis Primeiru-Ministru no eis Ministru Saúde, nu’udar Koordenadór Ligasaun Ofisiál ba Forsa Tarefa.
5. Francisco Guterres, eis Sekretáriu Estadu Seguransa, nu’udar Koordenadór ba ekipa Estudu no Análize Risku.
6. Aurélio Guterres, eis Ministru Negósiu Estranjeiru no Kooperasaun, nu’udar Koordenadór Destakamentu Reasaun Rápida.
7.Dionísio Santos, Gabinete Primeiru-Ministru, nu’udar Koordenadór Administrasaun no Finansa.
8. José da Costa, atuál Prezidente Agência Tatoli.IP, nu’udar Koordenadór ba Unidade Informasaun Públika.
9. Afonso Henriques Corte-Real, Xefe Gabinete Primeiru-Ministru, nu’udar Ligasaun Ofisiál ba Komandu Operasionál (Primeiru-Ministru).
10. Nuno Machado Reis, asesór jurídiku Gabinete Primeiru-Ministru nian nu’udar Asesór Jurídiku ba Sala Situasaun.
PM Taur rasik hanesan Komandante Operasionál ba Sala Situasaun Hosi Sentru Integradu ba Jestaun Krize. (cao)
1,033 total views, 6 views today
Bele hare Video Seluk :
Subscribe to Timorpost
