DILI (timorpost.com) – Ministru Obras Públikas (MOP), Abel Pires, hatete durante ne’e nia identifika emprezáriu balun ba husu de’it sira atu fó projetu.
Nia hatete, tanba durante ne’e kompañia balun la tuir tender no laiha kontratu legál ruma, maibé sira halo de’it projetu no depois balun para de’it iha dalan klaran maibé husu Governu atu selu.
“Iha ema barak mak lori mai, no sira mai ko’alia ho ami, maibé ha’u esplika ba sira prosesu normál Lei mak haruka atu prosesu tender iha mak projetu ne’e bele la’o,” nia hateten iha Parlamentu Nasionál, Kinta (15/09).
Maibé nia parte hanesan Ministru apela ba sira kuandu laiha baze legál ruma ka laiha kontratu di’ak liu lalika halo servisu lai, tanba ne’e difikulta ba Governu atu selu.
Tanba baze legál ba Governu atu selu sira-nia projetu sira, ida kontratu ne’e, maibé se kuandu kontratu laiha difikulta ba Governu atu selu, maski sira halo ona projetu fizíku.
“Ha’u husu nafatin ba ita-nia emprezáriu sira maski iha kapasidade no iha intensaun ajuda halo dezenvolvimentu ba rai ida ne’e, maibé tenke tuir nia regras ne’e no tuir lai prosesu tender,” deklara nia.
Nia hatete, labele ba haree estrda no Ponte sira, halo uluk ona mak Governu atu selebra fali kontratu tuir ne’e labele, no Governu difikulta atu selu.
Tanba ne’e, nia fó ezemplu real projetu hamutuk 143, ne’ebé to’o agora Governu seidauk bele selu tanba problema laiha kontratu maibé projetu fizíka sira halo ona.
8,831 total views, 3 views today
