DILI—Prezidente Repúblika Francisco Guterres Lú Olo, Primeiru Ministru Taur Matan Ruak ho Prezidente Tribunál Rekursu Deolindo dos Santos, iha loron Sexta (13/03/2020), kuda ai-oan Mangrove iha area Sabuli Metinaro, Munisípiu Dili.
Marka prezensa mós iha inisiativa Prezidente Repúblika ba programa “Sidadaun Ida, Ai-oan Ida” ne’e, autoridade lokál Postu Administrativu Metinaro, korpu diplomátiku, estudante no juventude sira no funsionáriu husi Palásiu Prezidensiál.
Atividade ne’e ba loron hanesan organiza mós iha Beakou-Bobonaro husi Chefe Casa Civil no iha Ulmera-Likisá organiza husi Diretór Jerál Prezidénsia Repúblika.
Iha loron 25 fulan Janeiru 2019, Prezidente Repúblika, Francisco Guterres Lú Olo, lansa kampaña nasionál “Sidadaun Ida, Ai-oan Ida”.
Kampaña nasionál Sidadaun Ida, Ai-oan Ida, nu’udar parte husi kompromísu polítiku husi Prezidente Lú OLo hodi promove meiu ambiente no dezenvolvimentu ida sustentável, ne’ebé fó sai iha serimónia tomada pose iha Tasi Tolu 20 Maiu 2017.
Hafoin nia lansamentu, Governu, Organizasaun Sosiedade Sívil, Ajénsia Internasionál, Igreja Katólika, Estudante no kuaze entidade tomak, simu no habelar kampaña ne’e ba teritóriu tomak Timor-Leste nian.
Rejista ai-oan ne’ebé kuda ona iha teritóriu tomak hamutuk 624.873 no númeru ne’e sei aumenta iha tinan 2020 no tinan sira tuir mai ho partisipasaun timoroan tomak nian. (cao)
692 total views, 6 views today
Bele hare Video Seluk :
Subscribe to Timorpost
