DILI—Ajénsia Toos ba Moris Di’ak (TOMAK) husi Austrália ne’ebé hala’o parseiru ho Ministériu Agrikultura no Peskas (MAP), iha Komoro, Dili provijoriamente taka tanba italianu ne’ebé sai suspeitu ba virus Corona hasoru malu ona ho funsionáriu sira.
Italianu ne’e hala’o viajen to’o iha Dili iha loron Domingu (02/03/2020) tanba hetan kontratu husi Embaixada Austrália hodi halo evaluasaun ba programa TOMAK nian durante implementa iha Timor Leste liuliu iha Baucau, Vikeke no Maliana.
Nune’e, durante nia iha Dili hala’o ona reuniaun ho funsionáriu sira iha TOMAK, hasoru ona funsionáriu balun iha Embaixada Austrália, nune’e mós hasoru malu ona ho líder másimu iha PHD hanesan mós ajénsia internasionál ida husi Austrália no M&E House.
Tuir fonte kredivél Timor Post iha Embaixada Austrália haktuir, atividade iha embaixada la’o normal hela maibé funsionáriu sira ne’ebé hasoru ona Italianu ne’e labele tama servisu.
Nune’e mós funsionáriu sira iha PHD inklui líder másimu la tama ona servisu durante loron rua hafoin Italianu ne’e sai suspeitu ba virus corona.
Italianu ne’e agora izola hela iha Klínika STAMFORD MEDICAL LDA Mandarin Dili.
Suspeitu hala’o viajen husi Itália liuhusi Dempasar-Bali.
Iha loron Sábadu (07/03/2020) suspeitu sente isin manas no flu (fani no inus ben) hafoin hala’o serviu nia ba konsulta iha Klínika STAMFORD MEDICAL LDA Mandarin Dili, maka doutór sira nota iha sinál virus corona no haree ba nia istória viajen husi Itália nu’udar nasaun ne’ebé vítima husi virus ne’e sa’e maka’as iha Europa, doutor sira deside izola pasiente ne’e no fó informasaun ba ministériu saúde hodi servisu hamutuk iha atendimentu.
Klínika STAMFORD MEDICAL LDA ho ministériu saúde haruka ona sampel rán suspeitu nian ba halo teste iha laboratórium Darwin-Austrália.
Tuir informasaun, rejultadu husi teste ne’e iha ona maibé parte kompetente seidauk fó sai katak suspeitu pozetivu ka negativu husi virus Corona.
To’o notísia ne’e fó sai, Timor Post seidauk hetan konfirmasaun husi Embaixada Austrália no parte kompetente kona-ba italianu ne’e nia preparasaun no viajen mai Dili iha teste ba nia saúde ka la’e no kontrolu sira iha aeroportu sira durante nia atravesa.
Diretóra Jerál Prestasaun Saúde, Ministériu Saúde, Odete Viegas da Silva ba Jornalista sira, iha loron Segunda (09/03/2020), haktuir, loloos ministériu saúde ho liña ministeriál inklui Organizasaun Mundiál Saúde (OMS) iha domingu (08/03/2020) transfere ona suspeitu ne’e ba fatin izolamentu iha Suku Tibar, Postu Administrativu Bazartete, Munisípiu Likisa, maibé komunidade sira boikota tanba lakohi fatin ne’e hanesan karantina ba virus Corona.
Entretantu iha oras, tuku 17:45, Segunda, Marsu 09, 2020, ofisiál mídia ministériu saúde nian fó sai informasaun katak, suspeitu ba kazu virus Corona ka COVID-19 Italianu ne’e kontinua iha kondisaun estavel no hetan observasaun médiku. (cao)
469 total views, 3 views today
Bele hare Video Seluk :