DILI (Timor Post)—Parlamentu Nasionál (PN), konsege ratifika konvensaun internasionál ba ema ho defisiénsia (EhD), ne’e importante tebe-tebes iha Timor Leste (TL), tanba Lei ne’e rasik atu valoriza defisiénsia sira-nia direitu ba kapasidade umana.
“Konvensaun nasaun refere nia prosesu implementasaun ba situasaun real, ladauk aprofunda no asesibilidade ba sira, atu asesu ba instituisaun públiku sira,” dehan Vise Prezidente Bankada Partidu Kongresu Nasionál Rekonstrusaun Timorense (CNRT), Deputadu Patrocínio Fernandes, iha PN, Segunda (01/07).
Nia dehan, kestaun ne’e importante tebes ba estadu tomak, durante konvensaun retifika ona entre vigor nu’udar lei ida, tanba ne’e preokupasaun estadu nian atu haree situasaun ne’e.
“Ita hanoin katak Parlamentu Nasionál mós preokupa ba trata xamada husi Estadu no nasaun ne’e nian, tanba ne’e Governu tenke mai ho polítika no programa integridade no igualdade”, nia subliña.
Nia dehan, Governu labele haree de’it mak grupu ida, tanba ne’e labele kria polítika no programa diskriminasaun ba nasaun ne’e, tanba estadu ne’e nu’udar órgaun boot ida ne’ebé reprezenta povu no sidadaun Timoroan hotu.
Tan ne’e nia hato’o, Governu no Estadu iha obrigasaun ba kestaun ida ne’e, hodi haree ba situasaun ne’ebé hosi konvensaun ne’e haruka.
“La’ós tuir de’it konvensaun, maibé antes ita ratifika konvensaun ne’e ita-nia Lei Konstituisaun Repúblika, ko’alia kona-ba tratamentu Igualdade ba sidadaun hotu-hotu, tanba ne’e la’ós ko’alia ba sidadaun defisiénsia maibé sidadaun Timor-Leste”, nia hateten.
Nia hatutan, Governu tenke iha planu di’ak hodi haree dezenvolvimentu liuliu, iha edifísiu públiku nian atu atende ba povu, tenke iha kondisaun adekuada, no valoriza sidadaun hotu nia natureza fíziku.
“Tempu barak ona Governu ladún iha polítika másimu, maibé fiar katak Governu tuir mai sei iha planu no programa polítika ida ne’ebé prioridade ba asuntu ne’e. Tanba ne’e mak hakarak dehan, Governu no estadu tenke iha programa sériu ba Lei ne’ebé ratifika ona ba sidadaun defisiénsia sira”, nia hakotu.
3,061 total views, 15 views today
