DILI (Timor Post)- Planu konstrusaun edifísiu foun Parlamentu Nasionál, Ministru Asuntu Parlamentár no Komunikasaun Sosiál, Francisco Jerónimo, hatete fixu ona harii iha Hera, Postu Administrativu Kristu-Rei, Munisípiu Dili.
“Ohin ha’u halo enkontru semanál ho Primeiru Ministru, hodi relata kona-ba atividade servisu ne’ebé halo iha Parlamentu Nasionál, nune’e mós informa katak, Parlamentu Nasionál husu Governu atribui propriedade ida hodi halo edifísiu foun,” nia hateten iha Faról, Segunda (01/08).
Nia reforsa tan, tanba Asuntu ne’ebé Parlamentu husu mak hakarak entrega rai ida ba sira hodi halo sira-nia Edifísiu foun ba futuru nian.
“Entaun ida ne’e ha’u ho Ministru Finansas inklui Ministru Justisa, hasoru ona Prezidente Parlamentu Nasionál, diskute no iha ona solusaun, katak rai ne’ebé uza atu halo ne’e mak iha Hera,” deklara nia.
Governante ne’e reforsa tan, tanba ne’e iha tempu badak Governu sei halo atribuisaun rai ida ne’e ba Parlamentu Nasionál, hodi halo sira-nia konstrusaun.
“Sira husu rai ektare 10, entaun Governu mós prontu ona atu aprezenta no iha tempu badak sei halo atribuisaun ba Parlamentu Nasionál, maibé tenke halo uluk lai levantamentu tékniku ba rai ne’e no mós saida mak atu halo karik kuandu komunidade balun hela iha rai Estadu ne’e,” hateten nia.
Tanba ne’e nia dehan, sei haree hela atu fó indeminizasaun ba komunidade sira ne’ebé hela iha ne’ebá, maibé mós tenke haree lai ho dadus ne’ebé ho loloos.
3,043 total views, 3 views today
