DILI (Timor Post)- Vise Primeiru Ministru no Ministru ba Planu Ordenamentu no Territóriu, José Maria Reis, aprezenta nia planu Ordenamentu Teritoriu Timor-Leste no urbanizasaun Sidade Dili, ba Primeiru Ministru (PM), Taur Matan Ruak.
“Ohin ha’u ho ekipa mai aprezenta ba Primeiru Ministru, kona-ba servisu ne’ebé ami halo, liuliu ohin mai aprezenta Planu Nasionál Ordenamentu no Teritoriu Timor-Leste nian,” nia hateten iha rezidénsia Xefe Governu, Faról, Sesta (29/07).
Nia dehan, aprezenta mós Planu urbanu sidade Dili nian ne’ebé foin hahú iha fulan Fevereiru nia laran, ne’ebé ohin halo aprezentasaun ne’e iha parte balun de’it, tanba sei lori fulan hira tan foin halo hotu.
“Planu Nasionál Ordenamentu Teritoriu ne’ebé ami-nia ekipa halo ona kuaze pursentu 75 no fulan hirak tan ekipa husi Ministériu Planu no Ordenamentu Teritoriu, sei halo hotu servisu ida ne’e,” deklara nia.
Nia subliña, iha fulan Outobru ka Novembru nia laran sira sei lori Planu ne’e ba aprezenta iha Konsellu Ministru, hodi bele halo aprovasaun.
“Kuandu aprova ita kaer ida ne’e hanesan Lei ida hodi bele asegura ninia implementasaun sira kona-ba Planu Ordenamentu Teritoriu Timor-Leste no Planu urbanu Sidade Dili nian,” nia afirma.
Governante ne’e reforsa, Planu Nasionál Ordenamentu Teritoriu ne’e hanesan instrumentu ida ne’ebé orienta iha setór hotu-hotu hodi halo dezenvolvimentu ida ne’ebé integradu.
“Nune’e halo jestaun di’ak ba iha okupasaun Teritoriu no mós proteje ambiente rekursu limitadu sira ne’ebé ita iha, ida ne’e mak ohin ami aprezenta rezultadu servisu ne’ebé ami halo ba Primeiru Ministru,” nia hakotu.
2,013 total views, 3 views today
