Dili (Timor Post) – Primeiru Ministru (PM), Taur Matan Ruak, sente triste Timoroan sira halo konfrontu iha ema nia Rai.
Nia hatete, uluk Timoroan Jagoan hit Bandeira Repúblika Demokrátika Timor Leste (RDTL), maibé agora balu iha Rai liur hatun fali Bandeira RDTL.
“Ha’u triste loos, Timoroan uluk kuandu ita luta iha fatin-fatin ne’e, jagoan hodi ukun aan, no foti bandeira Timor, agora ne’e balu iha malae nia Rai hatun fali ita-nia bandeira, ne’e ladun di’ak,” nia dehan hafoin remata enkontru ho Prezidente Repúblika, José Manuel Ramos Horta, iha Palásiu Prezidensiál Bairru-Pité, Kinta (28/07).
Nia subliña, nu’udar Maun, Aman husu ba oan no alin Timoroan sira liuliu ba sidadaun hotu-hotu, haree hadi’a komportamentu.
“Ita nasaun ida, nune’e ba ita-nia komportamentu ne’e tenke sivilizadu uitoan, tanba buat ne’ebé ita halo iha fatin seluk, ne’e ita-nia naran dois hotu,” nia apela.
Tanba ne’e, Xefe Governu fó ezemplu, se haree ba sira ne’ebé sei solteiru ladún, mais sira ne’ebé kaben na’in, hanesan sira-nia oan ba halimar iha ema nia uma, hotu estraga ema nia sasán ou halo sala ema ninia buat ruma, nune’e husi ema ne’ebá mai trata dehan, “o nia Inan-Aman la hanorin”, afinal Inan Aman la sala buat ida.
“Ha’u hakarak hatete, ita repodia, ita la gosta no ita lakoi, atu husu sira revei sira nia komportamentu, hodi hatudu buat ne’ebé di’ak,” nia hakotu.
2,160 total views, 6 views today
