DILI (Timor Post)—Primeiru Ministru (PM), Taur Matan Ruak, rekoñese burokrasia iha Governu Timor-Leste ne’e todan tebes.
“Ita boot sira haree de’it ita-nia burokrasia ne’e todan tebes, no ida ne’e la fó efisiénsia ba ita-nia governasaun,” dehan nia hafoin lansa fatuk dahuluk ba konstrusaun Bibliotena Nasionál, iha Hudi-Laran, Tersa (19/07).
Enkuantu Primeiru Ministru, deklara ida ne’e tanba, fundu atu halo Biblioteka Nasionál ne’e hahú kedas iha 2014 momentu nia parte sei hanesan Brigadeiru Jenerál F-FDTL, depois mai Prezidente Repúblika agora kontinua sai Primeiru Ministru no mandatu hela fulan sia atu remata ona maibé ohin konsege lansa duni projetu ida ne’e.
“Fundu ne’e dezde iha 2014 maibé la la’o, entaun momentu ha’u sai Prezidente Repúblika ha’u deside hodi hatudu rai ida ne’e no ohin konsege hahú ona projetu, tanba durante tinan naruk la halo,” nia subliña.
Nia reforsa tan, tanba burokrasia ne’e mak todan prosesu sira tenke la’o tarde no neineik, tanba burokrasia iha no todan tebes.
“Entaun burokrasia ida ne’e ita tenke kombate iha tempu oin mai, tanba tempu ne’e moris no tempu ne’e osan mean, ne’ebé Maromak fó mai ita atu haree buat furak sira hotu iha mundu ida ne’e,” nia deklara.
2,209 total views, 3 views today
