DILI (Timor Post)—Parlamentu Nasionál (PN), autoriza pedidu konsentimentu Prezidente Repúblika, José Manuel Ramos Horta, hodi hala’o vizita Estadu ba iha nasaun viziñu Indonézia.
“Rezultadu votasaun afavor 60 kontra zero no abstensaun zero, nune’e pedidu autorizasaun aprovadu”, deklara Prezidente Parlamentu Nasionál, Aniceto Longuinhos Guterres Lopes, iha plenária Parlamentu Nasionál, Tersa (12/07).
Foin lalais ne’e, meza Parlamentu Nasionál, deside atu adia diskusaun no votasaun ba pedidu autorizasaun vizita Prezidente Repúblika, José Ramos Horta, ba nasaun viziñu Indonézia.
Prezidente Parlamentu Nasionál, deklara deputadu hothotu konkorda adia votasaun, maibé prazu atu fó konsentimentu molok tama loron 14 fulan Jullu.
“Hothotu konkorda atu adia, ita tempu sei iha mais tarde dia 14 ita tenke iha ona rezolusaun ba konsentimentu, tanba vizita sei hahú dia 18, ha’u hanoin ita aguarda hela iha bankada sira atu buka entendimentu”, Aniceto deklara iha Plenária Estraordináriu Parlamentu Nasionál.
Pontu de-vista hosi Xefe Bankada KHUNTO deputada Olinda Guterres, obriga atu bele halo diskusaun no votasaun ba pedidu autorizasaun viajen Prezidente Repúblika.
“Ha’u hanoin ita vota agora, ha’u iha esperansa tebes katak liu, KUNTO la’ós labarik ki’ik mak atu hanorin fatin, ita tenke aprova atu na’in ulun ba rai li’ur, labele hanesan uluk ha’u la gosta ida, ha’u fó hatene tiha ona tenke vota afavor”, nia hateten.
Intervensaun Xefe Bankada Fretilín deputadu David Dias Ximenes ‘Mandati’, hakarak adia diskusaun no votasaun pedidu Prezidente Repúblika ho razaun deputadu sira la prienxe kuorum.
Nune’e mós, intervensaun hosi Vise-Prezidente Bankada Partidu Libertasaun Popular (PLP), deputadu Francisco de Vasconcelos, hakarak atu deputadu sira halo votasaun ho razaun ajenda barak.
Entretantu, Vise-Prezidente Bankada CNRT deputadu Patrocínio Fernandes, lamenta tanba ajenda importante ba plenária estraordináriu mak atu fó konsentimentu ba viajen Premiadu Novel ba Pas.
Prontu ida ne’e polítika no fatin polítika, tanba bankada boot ida (Fretilín) mak husu atu bele adia, para bele iha tan intendimentu di’ak liu hosi bankada governu nian.
“Ita hein katak tempu badak, tenke lalais autorizasaun ba vizita prezidente repúblika nian, lamentavel uitoan mais ida ne’e mak situasaun”, nia lamenta.
Prinsípiu bankada opozisaun espera konta didi’ak pedidu autorizasaun, nune’e hakat daudauk ba oin, atu haluha tiha impase polítika tinan kotuk.
Relasiona ho rejimentu parlamentár ezije atu bele meza Parlamentu Nasionál ajenda, ajenda importante sira atu bele halo diskusaun no votasaun, maibé desizaun kontein polítika mak makaas.
Previzaun Xefe Estadu atu dezloka ba rai li’ur molok loron 18 fulan Jullu, deputadu sira tenke pedidu autorizasaun tenke halo kedas konsentimentu.
Bankada CNRT lakohi atu halo komentáriu, importante mak meza Parlamentu Nasionál, tenke delibera duni pedidu autorizasaun ba Prezidente Repúblika.
1,954 total views, 3 views today
