DILI—Sekretáriu Jerál Uniaun Demokrata Timorense (UDT), Francisco David Xavier Carlos afirma, FRETILIN nia Sekretáriu Jerál Marí Bim Amude Alkatiri nia deklarasaun kona-ba destinu koligasaun foun ne’ebé CNRT, PD, KHUNTO, FM, PUDD ho UDT rasik forma, hanesan haluha realidade.
Francisco dehan, Alkatiri bele dehan koligasaun foun ne’e sei la moris, maibé realidade ne’ebé iha maka partidu neen ne’ebé forma koligasaun ne’e ho kadeira 34 iha parlamentu nasionál iha ona forsa hodi forma governu dasia no hakotu impase polítika atuál.
“Ne’e opiniaun polítika sira mak hanesan ne’e duni, dehan sei la moris ne’e, prontu talvez ho (Alkatiri) nia pontu de vista sobre koligasaun ne’ebé hahú ami forma tiha ona. Agora nia razaun saida dehan sei la moris talvez nia hatene liu ou nia la hatene saida mak funsiona iha koligasaun ne’e rasik,” Líder partidu UDT ne’e hatete ba Timor Post iha Parlamentu Nasionál, Kuarta (04/03/2020).
“Alkatiri nia opiniaun ne’e kontraria los ho realidade ne’ebé ke ami hala’o daudaun agora ne’e,” Francisco salienta.
Iha fatin no loron hanesan, Xefe Bankada CNRT, Duarte Nunes, hatete, saida mak Alkatiri ko’alia ne’e bele sai realidade tanba desizaun hotu sei mai husi Prezidente Repúblika Francisco Guterres Lú Olo.
“Sé ita hotu akompaña kuandu Alkatiri ko’alia ne’e adiviña tiha prezidente republika nia pensamentu ne’e mai loloos kedas. Nebe dala ruma ita bele fi’ar katak buat ne’ebé nia (Alkatiri) ko’alia ne’e prezidente sei ko’alia,” Duarte ba Jornalista.
“Ha’u rona beibeik, ha’u bele kalkula ou imajina katak ida ne’e mak sei sai pozisaun prezidente repúblika nian,” Duarte hatete. (ato)
702 total views, 3 views today
Bele hare Video Seluk :
Subscribe to Timorpost
