DILI (Timor Post)- Partidu Libertasaun Popular (PLP), Domingu (03/07), realiza konsolidasaun ho objetivu hametin unidade polítika hodi bele hasoru eleisaun parlamentár (ELPAR).
Koordenadór Estrutura Nasionál PLP, Longuinhos dos Santos, hatete militante, simpatizante no povu timoroan tomak tenke hametin konfiansa ba Partidu Libertasaun Populár, hodi bele hasoru dezafiu iha eleisaun parlamentár, ne’ebé sei realiza iha tinan 2023.
“Ita-nia Unidade polítika mak bele lori mudansa ba povu no nasaun, Tanba ne’e organizasaun polítiku hot-hotu husi partidu nian tenke fó apoiu ba malu hodi lori mudansa dezenvolvimentu ne’ebé di’ak”, nia hateten hafoin konsolidasaun iha Manleuana.
Nia dehan, ré-ajustamentu estrutura ne’e, sempre garante katak mai ho Eroi Gerrilleiru Jenerál Taur Matan Ruak, nia fileira hodi garante natureza polítika PLP katak sei aumenta kadeira husi konfiansa povu nian.
“Ami iha Prinsípiu katak tenke Liu barreira, tanba ne’e mak ami servisu makas ba estrutura hot-hotu husi nasionál, rejionál, too lokál, katak mantein nafatin konfiansa sei lori mudansa ba PLP iha tinan 2023-2027”, Nia subliña.
Tanba ne’e nia alerta ba Militante no Simpatizante sira hotu iha Timor Laran tomak, katak hametin nafatin konfiansa ba fileira PLP, ba hasoru dezafiu iha eleisaun Parlamentár (ELPAR).
Alende ne’e mós Koordenadór Postu Administrativu Dom Aleixo, Mario Freitas, hatete sira reajusta tomada de pose, Postu Don Aleixo nian, signifika atu unifika forsa polítika ba iha fileira PLP nian ba tinan 2023-2027.
“Ha’u Husu Militante no Simpatizante sira hotu iha territóriu Timor laran tomak, mantein nafatin ho prinsípiu partidu PLP nian, atu lori mudansa ba povu no nasaun”, nia afirma.
1,312 total views, 3 views today
