(Reportajen Estaziadu Mariano Abi/Asistente Editor Hermenegildo da Costa Tilman)
Dili (Timor Post)–Organizasaun Uniaun Defisiénsia Matan Timor-Leste (UDMTL), ohin Sesta loron 17 fulan ne’e, hasoru malu ho Prezidente Repúblika (PR), José Ramos Horta, hodi hato’o asuntu rua, kona ba preokupasaun UDMTL nian.
Diretór Ezekutivu UDMTL, Jacinto Pereira, hatete, ohin organizasaun UDMTL hasoru malu ho Prezidente Repúblika, hodi ko’alia asuntu rua ba Prezidente Repúblika, ida mak husu PR Horta, hodi halo pareser ba Ministériu Solidariedade Sosiál (MSS), no ida fali maka ba Ministériu Edukasaun Juventude no Desportu (MEJD).
“Organizasaun UDMTL liu husi soru mutu ho PR husu atu PR bele halo pareser ba MSS liga ba apoiu instituisaun organizasaun UDMTL ninian, segundu maka ami husu ita nia Prezidente, katak, iha ninia mandatu ne’e, atu bele fó pareser ruma ba iha MEJD, hodi bele estabelese tan eskola Sekundáriu, liu-liu ensinu rekorrente bele estabelese tan ba Ema ho Defisiénsia matan sira atu asesu”,
Nia hatete, Tanba daudaun ne’e, sira foin estabelese to’o de’it iha Pre-Sekundáriu, entaun ami nia maluk sira ne’ebe mak remata iha pre- sekundáriu ne’e, atu ba tan Sekundáriu ne’e susar, ne’e mak ami husu ita nia Prezidente Repúblika, katak, iha ninia mandatu atu halo ida ne’e mós.
Diretór Ezekutivu, Jacinto hatutan, husi asuntu rua ne’e, Prezidente Repúblika responde katak, sei haruka asesór sira ou ekipa sira, tuun direta iha UDMTL nia fatin atu hare sira ninia preokupasaun refere.
“Iha asuntu rua ne’e, Prezidente Repúblika resposta, katak, sei haruka asesór sira ou ekipa sira, tuun direta iha ami nia fatin, no nia husu asesór sira mós sei halo kontaktu direta mós MSS, atu nune’e ita nia Prezidente ko’alia ho sira, liu-liu kona-ba apoiu institusionál ida ne’e, no nia mós sei ko’alia ho xefe departamentu sira iha parte, ensinu Sekundáriu nian,”.
Kona ba Organizasaun Uniaun Defisiénsia Matan Timor-Leste (UDMTL), harii iha 2004, ho ninia membru hamutuk 3000, maibé daudaun ne’e ativu na’in-40. Hakotu (Lee Notísia Seluk Iha Jornál Timor Post/ Asesu You Tube Timor Post).
426 total views, 6 views today
