(Reportajen Jaime Pires/Editor Mateus da Cruz)
DILI (Timor Post)- Deputadu husi bankada Frente Revolusionáriu Timor Leste Independente (Fretilín) Fabião de Oloveira, kritika Ministériu Transporte no Komunikasaun (MTK) tanba la halo regra hodi kontrola movimentu karreta kontentór.
“Karreta tula kontentór sira ne’e halo sidade Dili ne’e kada loron sempre macet, horisehik ha’u haree iha Kolmera tesik mai Portugál Dili ne’e sira halo macet maka’as, sira ne’e tuir loloos labele la’o loron,” nia dehan iha Plenária Parlamentu Nasionál, Segunda (06/06).
Nia hatete, bainhira karreta kontentór halo engrfamentu iha estrada laran ne’e fó perigu ba transporte públiku sira seluk atu halo movimentu ba asuntu urjente ruma.
“Liu-liu kuandu ambulánsia ruma tula ema moras todan susar bele atrapalla ho macet ne’e ema bele mate de’it iha dalan ka iha Ambulánsia laran,” Nia dehan.
Tanba ne’e nia husu ba Ministériu Transporte no Komunikasaun atu tau regra forte hodi aplika ba kompañia no kondutór karreta tula kontentór sira.
“Tenke Halo regra ida ne’ebé mak rigor hodi fó ba motorizada sira no mós kompañia sira ne’ebé mak iha karreta tula kontentór sira ne’e, atu nune’e sira halai kalan de’it loron labele, tanba sira halo macet,” nia hatete.
Hatán ba kestaun ida ne’e, Reprezentante Governu iha Parlamentu Nasionál, Ministru Asuntu Parlamentár no Komunikasaun Sosiál, Francisco Martins Jerónimo, dehan, preokupasaun sira ne’e nia parte sei hato’o ba parte ministériu relevante.
“Ha’u alista hotu ona deputadu no deputada sira nia preokupasaun no ha’u sei lori ba aprezenta iha Ministériu relevante no Konsellu Ministru hodi tau konsiderasaun ba Asuntu sira ne’e ho lalais,” hakotu. (Lee Notisia seluk iha Jornál Timor Post/Asesu You Tube Timor Post)
1,293 total views, 15 views today
Bele hare Video Seluk :