(Reportajen Estaziadu Cornelio Mota/Editor Mateus da Cruz)
DILI (Timor Post) – Ohin Igreja Universal Selebra Festa Pentekoste, iha misa ne’ebé hala’o iha Kapela Semináriu Maior interdiosezau São Pedro no São Paulo Fatumeta-Dili, selebrante eukarístika Pe. Sérgio Sarmento, husu ba sarani sira atu nafatin fo valór ba loron pentekoste ne’e.
Pentekoste mai husi lian grego, pentẽkostḗ ne’ebe signifika “quinquagésimo” katak loron 50,no loron ne’e liturjikamente sura husi Domingu Kristu moris hias nian to’o iha loron ikus Domingu tempu páskoa nian, tamba ne’e, ohin domingo (05/06), igreja katólika universal selebra festa solenidade pentekoste hodi hanoin loron ne’ebe espíritu santu tun ba Jesus Kristu Nia apóstolu sira ho Virjen Maria iha Senákulu.
“Loron pentekoste ne’e la’os deit ita selebra iha kalendáriu sira kada tinan, maibe nudár sarani katóliku ita presija valoriza nafatin festa boot ne’e iha ita nia moris no hein katak ho festa pentekoste ne’e halo ita rekoñese liu tan dons Espíritu Santu nian ne’ebe ita ida-idak simu ona iha ita nia batizmu sira,” dehan Pe. Sérgio.
Nia dehan, hanesan sarani, ne’ebe ohin selebra pentekostes halo ita hanoin fali ba buat ne’ebe acontece liu tiha ona, maibe husi selebrasaun ida ne’e atu ema hotu bele hetan forsa, nune’e fiar katak ita sei hetan trasnformasaun iha ita nia hahalok sira, hanesan apostolu sira husi tauk ba brani.
“Ita fiar katak espiritu santo ne’e mos ohin tun ba ita ida-idak atu transforma ita husi ita nia hahalok sira baruk ten nian ba badinas, husi hahalok foti-aan eh loko-aan ba haraik-aan, husi hahalok ódio eh vingansa ba perdua eh dame, husi hahalok violénsia ba domin na’in, husi hahalok destruisaun ba hahalok konstrusaun nian, husik hahalok laran moras nian ba hadomi malu, husi hahalok baku maluk, oho malu ba respeita malu,” haforsa nia.
Sinál espiritu santu ne’ebe horik ho ita ida-idak ne’e mak transforma ita sai ema foun katak ho espiritu santu ita sai ema foun. Ne’e duni, se ita moris duni iha espiritu pentekostes nian, ita sei la hatun malu, ita sei la estraga malu ho matenek ne’ebe ita iha, ho kapasidade ne’ebe mak ita iha, tan matenek eh inteligénsia ne’e mai husi Maromak, Maromak fó matenek mai ita ida-idak la’os atu estraga malu fali maibé atu utiliza hodi ajuda malu, lori malu ba Maromak no lori Maromak ba malu.
Espiritu santo ne’e tun ba apostolu sira hodi halo transformsaun radical no halo apóstolu sira brani koalia, fo sasin kona ba Kristu, Pentekostes mos halo apostulu sira la preokupa kona ba oinsa atu koalia no oinsa atu haklaken, maibé sira tau ona esperansa ba espiritu ne’ebe ohin sira simu.
Pentekostes transforma preokupasaun apostulu sira nian, katak ho pentekoste apostolu sira la hanoin ona kona ba ema seluk nia kompriende kona ba oinsa kompriende sira nia lian sira. Maibe, sira hatene ona katak sira sei haklaken duni Kristu ida ne’e.
“Penekoste mos transforma fatin apostolu sira nian, katak ho pentekostes apostolu sira la subar aan no la sulan aan iha fatin kiik oan de’it maibe, sira sai ba fatin luan, sai ba ema bara-barak hodi haklaken kona-ba Kristu ida ne’e, pentekoste halo asaun apóstulu sira ne’e sai hanesan obra sem fronteira, ohin ne’e limita iha fatin kiik oan ida maibe ba oin la iha tan ona limitasaun ba sira nia haklaken sira,” nia haklaken. (Lee Notísia Seluk Iha Jornál Timor Post/ Asesu You Tube Timor Post)
818 total views, 3 views today
