(Reportajen Olga Soares/Editor Mateus da Cruz)
DILI – Estadus Unidus liu husi Ajénsia Estadus Unidus ba Dezenvolvimentu Internasionál (USAID) no Ministériu Finansas Timor-Leste ofisialmente lansa atividade foun ba tinan tolu ho millaun 10,2 USD, hodi ajuda institusionaliza sistema komérsiu iha TL.
Sistema Komérsiu sei halo modernu, professional, transparante, responsavel, efisiente, efikás no responde ba Timor oan no kompativel ho padraun internasionál sira. Atividade ida ne’e sei impulsiona komérsiu no kresimentu ekonomia, hasae governu nia reseita, hasa’e integrasaun rejional no internasionál no mós haforsa boa-governasaun.
“Estadus Unidus kompremitidu hodi kontinua apoiu Timor-Leste iha implementasaun sistema komérsiu ne’ebé governa ho di’ak no modernu,” hateten Diretora Misaun USAID Zema Semunegus, liuhosi komunikadu ne’ebé Timor post asesu hosi Gabinete Mídia USA, Kinta (02/06).
USAID valoriza kooperasaun no kolaborasaun ne’ebé di’ak tebes ho Ministériu Finansas no Autoridade Aduaneria, inklui liuhusi USAID nia Projetu Reforma Aduaneria ne’ebé foin remata dadaun, ho estimadamente millaun 38 USD ba empreza Timor nian liu husi aumenta iha efisiensia.
“Ami espera atu kontinua servisu ho Timor-Leste ne’ebé agora esforsu hela atu halo reforma doméstika sira ne’ebé nesesaria hodi aliña totalmente ninia rejime komersiál ho regra Organizasaun Mundial ba Komérsiu no liberaliza ninia komérsiu,” esplika komunikadu ne’e.
Iha komunikadu ne’e mós Ministru Finansas, Rui Augusto Gomes, hateten tuir pedidu Governu Timor-Leste nian, USAID sei servisu hamutuk ho Ministériu Finansas, Autóriade Aduaneria, no ajénsia governu sira seluk, no mós ho setór privadu, hodi hadiak governasaun komérsiu, fasilitasaun komérsiu, no prosesu-sira alfandega nian.
Governu Estadus Unidus fornese millaun $10,2 liu husi USAID/Timor-Leste nia Atividade Governasaun Komérsiu hodi apoiu Autoridade Aduaneira Timor-Leste nian no ajénsia governu sira seluk ne’ebé mak liga ho komérsiu.
“Lansamentu USAID nia Atividade Governasaun Komérsiu foun ne’e marka pasu importante ida tan ba Ita-nia Autoridade Aduaneira,” nia hatete.
Apoiu millaun 10,2 USD ida ne’e hanesan apoiu signifikante ida no esensiál hodi permiti autóridade aduaneira iha ninia jornada atu sai organizasaun ida ne’ebé independente, konfiavel no efisiente, tau kliente nu’udar sentru iha ninia prestasaun servisu esensiál.
“Ami agradese Estadu Unidus Amérika no Povu Amerikanu ba sira-nia apoiu ne’ebé firme. Ami prontu atu haklean liután Ita-nia parseria hodi alkanse Autoridade Aduaneria nia meta ba longu-prazu ne’ebé mak atu halo komérsiu lailais liu, simples liu no justu liu,” nia ko’alia. (Lee Notísia Seluk Iha Jornál Timor Post/ Asesu You Tube Timor Post)
1,275 total views, 3 views today
