(Reportajen Jaime Pires/Editor Mateus da Cruz)
DILI (Timor Post )- Reuniaun Konsellu Ministru (KM), ohin, delibera ho autoriza Ministru Transporte no Komunikasaun (MTK), José Agostinho da Silva, Ministru Koordenadór Asuntu Ekonómiku, Joaquim Amaral, Ministra Saúde, Odete Maria Freitas Belo no Ministru Asuntu Parlamentár no Komunikasaun Sosiál, Francisco Martins da Costa Pereira Jerónimo, hodi halo negosia no asina akordu ho repúblika popular Xina.
“Konsellu Ministru delibera hodi autoriza Ministru Transporte no Komunikasaun, José Agostinho da Silva, atu negosia akordu ida Servisu Aéreu nian sira entre Governu Repúblika Populár Xina no Governu Repúblika Demokrátika Timor-Leste,” dehan Ministru Prezidensiál Konsellu Ministru Fidelis Magalhães iha Auditóriu Ministériu Finansas, Kuarta (01/06).
Nia hatete, iha reuniaun ne’e Konsellu Ministru mós delibera hodi fó podér tomak ba Ministru Joaquim Amaral asina mós akordu kooperasaun ekonómiku ho governu Repúblika Xina ninia, inklui mós ho akordu kona-ba área Téknika ninian.
“Konsellu Ministru delibera mós hodi fó podér tomak ba Ministru Koordenadór Asuntu Ekonómiku, Joaquim Amaral, hodi asina Akordu Kooperasaun Ekonómika no Téknika entre Governu Repúblika Populár Xina no Governu Repúblika Demokrátika Timor-Leste,” esplika Nia.
Alende ne’e delibera mós hodi fó podér tomak ba Ministra Saúde, Odete Maria Freitas Belo, hodi asina Akordu ida iha área Saúde nian entre Governu Repúblika Populár Xina no Governu Repúblika Demokrátika Timor-Leste.
Konsellu Ministru delibera hodi fó poder ba Ministru Asuntu Parlamentár no Komunikasaun Sosiál (MAPKOMS), Francisco Jeronimo.
Podér sira ne’ebé mak Konsellu Ministru delibera mak atu asina akordu ida ho Administrasaun Rádiu no Televizaun Nasionál Repúblika Populár Xina.
Podér ida seluk tan mak asina akordu ho governu Republikana Xina hodi halo dijitalizasaun ba Rádiu no Televizaun iha Timor-Leste.
“Konsellu Ministru delibera mós hodi fó podér tomak ba Ministru Asuntu Parlamentár no Komunikasaun Sosiál, Francisco Martins da Costa Pereira Jerónimo, hodi asina akordu ida entre Governu Repúblika Populár Xina no Governu Repúblika Demokrátika Timor-Leste ba kontinuasaun prosesu dijitalizasaun Rádiu no Televizaun Timor-Leste no ba faze daruak projetu televizaun dijitál terrestrial,” deklara Nia.
Iha soru mutu ne’ebé halao iha auditóriu Ministériu Finansas, iha Dili, Proposta mós Rezolusaun Parlamentu Nasionál ne’ebé ratifika Emenda Doha nian ba Protokolu Quioto, ne’ebé aprezenta husi Ministra Negósiu Estranjeiru no Kooperasaun, Adaljiza Albertina Xavier Reis Magno.
Protokolu Quioto ne’e maka tratadu internasionál ida iha ne’ebé nasaun sira ne’ebé asina akordu ne’e halo kompromisu hodi hamenus sira-nia emisaun gas ida-idak ne’ebé halo efeitu estufa iha atmosfera. Emenda Doha ba Protokolu ne’e mós hanesan kontributu importante ida hasa’e konxiénsia no mobilizasaun kona-ba nesesidade no ezijénsia ba esforsu boot ida nivel globál nian hodi kombate alterasaun klimátika sira, liuliu liuhusi hamenus emisaun gas ne’ebé halo efeitu estufa porsentu 5, iha média. Emenda ne’e ratifika ona husi nasaun 147.(Lee Notísia Seluk Iha Jornál Timor Post/ Asesu You Tube Timor Post)
554 total views, 3 views today
Bele hare Video Seluk :