(Reportajen Estaziadu Mariano Abi/Asistente Editor Hermenegildo da Costa Tilman)
Dili (Timor Post) – Komemorasaun loron Internasionál Labarik nian iha mundu inklui Timor Leste, Instituisaun Edukativa Kristal, Fundasaun Kristal (IEC-FC sigla portugés), realiza atividade halai karon, tata krupu no halai berlindus, hodi fó haksolok ba labarik sira iha Eskola Ensinu Báziku 1°, 2° no 3° siklu Kristal nian.
Prezidente Ezekutivu Fundasaun Kristal, Agostinho dos Santos Gonçalves, hatete, atividade ohin ne’e, IEC-FC hahú husi Ensinu Báziku 1°, 2° no 3° to’o programa mestradu, ba loron ohin ne’e, loron espesiál ba Mundial de Criansa maka loron 01 fulan Juñu ba iha mundu tomak, no nasaun Timor-Leste, ne’ebé mak Governu dekreta iha Lei, liu husi Ministériu Edukasaun katak, loron 01 fulan Juñu ne’e feriadu, nune’e ohin ita halo atividade espesiál ba labarik sira.
“Tanba ida ne’e, mak hahú iha fulan Juñu 2022, IEC-FC foti inisiativa ida ne’e, hodi bele organiza ou festeja, ita nia oan ou labarik sira iha IEC-FC, halo eventu simples ne’e, maka, kompetisaun halai karon, tata krupu no halai berlindus, ida atu ita bele festeja loron mundiál labarik nian,” nia dehan ba jornalista sira hafoin remata atividade ne’e iha kampu desportu Kristal Balidi, Kuarta (01/06).
Nia hatutan, nune’e mós ba Diretór sira, Profesores sira ne’ebé mak iha IEC-FC, atu fó atensaun ba labarik sira, ne’ebé ba labarik sira nia problema oinsá, ne’ebé ita tenke fó apresiasaun, no fó duni atensaun, hodi bele iha formasaun edukasaun ba mestre hotu-hotu, tenke ho domin maka hanorin, la bele ho Forsa no labele hirus.
“Ida ne’e mak ita sei buka, no ba inan aman sira mós ami sei halo programa, hodi fó atensaun ba labarik sira, tanba sira ne’e maka aban bairua sira maka sai joven no lider nasaun futuru nian, nune’e ita kuandu eduka, tenke ho domin, maski sira sala, maibé ita ho konxiénsia ho domin no hanoin sempre akompaña sira atu bele haruka ho diak,” nia dehan.
Hanesan Prezidente Ezekutivu Fundasaun Kristal, hakarak hato’o votu parabéns ba labarik sira iha mundu, no iha Timor Leste liu-liu ba labarik sira ne’ebé mak iha ISC-FC. Nune’e, husu ba labarik sira iha mundu tomak no liu-liu iha Timor Leste, atu rona no hadomi inan aman, bainhira inan aman ko’alia ho imi ou kurizi, ne’e la’ós hirus, maibé ho domin ne’ebé sira hatudu buat ruma ne’ebé sala ba imi tenke simu ho di’ak.
“Ne’ebé koopera no serbisu hamutuk ho inan aman, no iha eskola karik ho mestre sira, atu nune’e imi ninia futuru, imi sei hetan formasaun ne’ebé mak di’ak, atu aban bairua imi sai lider ne’ebé mak diak, nune’e agora hadomi inan aman, rona sira, no sempre koopera ho inan aman,” nia hakotu. (Lee Notísia Seluk Iha Jornál Timor Post/ Asesu You Tube Timor Post)
478 total views, 3 views today
