(Reportajen Estaziadu Cardenio Alves/Editor Mateus da Cruz)
DILI (Timor Post)- Plan International Global iha Timor Leste (PITL), lansa aplikasaun Saúde Reprodutiva (SR), aplikasaun ne’e importante tebes atu hasa’e koñesimentu foin-sa’e liu-liu feto sira hodi asesu ba informasaun saúde reprodutiva no fornese servisu ba feto foin-sa’e sira hotu atu responsabiliza aan ho di’ak liu husi saúde humanu.
“Plan internasionál halo lansamentu ba saúde reprodutiva ba Juventude hanesan feto ho mane sira, kuaze iha nasaun ualu nulu resin lima, inklui TL, Plan Internasional iha atinjimentu haat (4)”, hatete husi Diretora plan internasionál Timor Leste, Deliana Ximenes, iha Novu Turizmu, Tersa, (31/05).
Nia hatete, atinjementu ne’e plan internasionál hala’o ba labarik feto ho idade reprodutivu bele aprende saida mak saúde reprodutiva hodi sai feto ne’ebé forte hodi bele foti desizaun, hodi halo saida mak Sira hakarak no bele realiza sira nia mehi.
“Labarik feto bele foti desizaun kona ba sira nia isin lolon, ne’ebé iha realidade katak ha’u nia isin, ha’u nia desizaun mak ha’u nia futuru ho sentidu ida katak ha’u lakohi kaben sedu, isin rua sedu tanba ne’e fó espasu ba labarik ho feto bele lao tuir desizaun ne’ebé nia foti “, nia hatete.
Ambassador Plan Internasionál Timor Leste, ba Advokasia no Kampaíña ba impaktu negativu husi kaben sedu no isin rua sedu, mós hapara violénsia hasoru feto no labarik feto iha TL, Sidalia Lopes Mouzinho, husu ba labarik feto sira tenke partisipa ativu iha informasaun saúde reprodutiva, atu bele la’o tuir direitu no desizaun nu’udar feto.
“Ha’u orgullu tebes ba programa plan internasionál nian iha Timor Leste, ne’ebé halo lansamentu ba aplikasaun saúde reprodutiva atu motiva no fó informasaun di’ak Liu tan ba feto maluk sira hodi rekoñese nia saúde no mós ba kondisaun nu’udar feto reprodutivu”, nia hakotu.
Alende ne’e Reprezentante saúde, Silvano Pedro, hatete, programa ida ne’e atu apoiu ministériu saúde ba saúde feto sira nian, atu bele rekoñese di’ak ba direitu nu’udar feto ne’ebé mak iha direitu mós hanesan mane sira.
“Programa ne’ebé mak Plan Internasionál halo sai meiu ida ne’ebé di’ak hodi ajuda ba feto sira atu bele kuidadu sira nia saúde ho di’ak, sira direitu atu foti desizaun ba Sira nia futuru,” nia hatete.(Lee Notísia Seluk Iha Jornál Timor Post/ Asesu You Tube Timor Post)
565 total views, 3 views today
