(Reportajen Estaziadu Mariano Abi/Editor Mateus da Cruz)
Dili (Timor Post) –Uniaun Europeia (UE) iha Timor-Leste, tinan ne’e selebra loron Europa ho organizasaun “Feira Loron Europa” durante loron rua, iha loron 27 no 28 Maiu, iha Dili, Timor Plaza, Sesta (27/05).
Feira ne’e loke ofisiálmente husi Prezidente José Ramos-Horta, hamutuk ho Embaixadór Uniaun Europeia, Andrew Jacobs.
Iha selebrasaun ne’e, hanesan ho selebrasaun sira husi aniversáriu ba dala XX husi restaurasaun independénsia Timor-Leste nian, “Feira Loron Europa” atu selebra parseria besik no metin entre Timor-Leste no Uniaun Europeia, ne’ebé sai forte liu tan.
Prezidente Repúblika Demokrátika Timor Leste (RDTL), Jose Manuel Ramos Horta, hatete, atividade inisiativa ida ne’e diak tebe-tebes, tanba fó hatene sai informasaun ba liu husi atividade Feira Loron Europa nia emvigor, nune’e mós sira nia parseria ho Governu no Ajénsia Internasionál sira, hanesan Nasoes Unidas, no Organizasaun Noun Governamentál (ONG) sira iha Timorese.
“Ho ida ne’e, ha’u koñese Uniaun Europeia hanesan, koñese uma laran, atividade no apoiu, ho instituisaun ida diak tebe-tebes ho forsa kresimentu ba Timor, nune’e mós sira ninia boot iha Europeia ne’ebá sempre solidária mai Timor Leste. Atu nune’e Portugal bele hatene númeru iha UE nia laran sempre dudu jestaun Timor nian ba oin,” nia relata ba jornalista sira, hafoin loke feira ne’e.
Entretantu, Embaixadór Uniaun Europeia, Andrew Jacobs, iha ninia diskursu abertura hatete, Uniaun Europeia iha parseria tempu kleur ona ho Timor-Leste, ne’ebé bazeia ba valór sira hanesan husi demokrasia, direitu umanu no husi Estadu Direitu.
“Tinan ne’e, ami marka Loron Europa ho selebra no hatudu impaktu husi UE iha Timor-Leste, iha tinan 20 ikus mai husi parseria susesu ho imi hotu, sidadaun timoroan sira, parseiru dezenvolvimentu sira, sosiedade sivíl no instituisaun governamentál sira,” nia dehan.
Enkuantu, Timor Post Online Asesu tan iha komunikadu katak, kona-ba Loron Europa, loron Europa hala’o tinan-tinan iha loron 9 fulan Maiu, hodi selebra dame no unidade iha Europa.
Data ne’e, marka aniversáriu Deklarasaun husi Robert Schuman, iha tinan 1950, ne’ebé iha tempu ne’ebá nia propoin parseria ekonómika, entre Fransa no Alemaña, ne’ebé halibur produsaun karvaun no besi.
Nia vizaun maka, atu kria uniaun ida iha Europa nia laran, ne’ebé halo atu la bele hanoin ba funu entre nasaun europeia sira. Tratadu Roma nian asina iha tinan 1957 halo proposta Schuman nian sai realidade, no ida ne’e marka inísiu husi Uniaun Europeia, hanesan ohin loron ita hotu koñese. (Lee Notísia Seluk Iha Jornál Timor Post/ Asesu You Tube Timor Post).
1,495 total views, 3 views today
Bele hare Video Seluk :
Subscribe to Timorpost
