(Reportajen Jaime Pires/Editor Mateus da Cruz)
DILI (Timor Post)- Primeiru Ministru (PM), Taur Matan Ruak, Ohin, ofisialmente loke hikas Arte Marsiál tolu maka hanesan, Persaudaran Setia Hati Terate (PSHT), Ikatan Kera Sakti (IKS) no Kmanek Oan Rai Klaran (KORK).
Iha serimónia abertura ne’e, Primeiru Ministru Taur Matan Ruak iha nia diskursu, hatete, Estadu Timor-Leste no governu iha polítika ida de’it mak halibur maibé la’ós fahe.
“Polítika ida ne’e la’ós ohin de’it mak ita adopta maibé uluk kedas ita uza polítika ida ne’e no lori polítiku ida ne’e mak ita manan funu, tanba ita boot sira nia lider barak iha ne’e uluk hamutuk ho ha’u luta ba ukun an, no ha’u kontente loos halibur fila fali imi hodi luta ba dezenvolvimentu Timor-Leste nia,” dehan Taur iha Jináziu Desportu Dili, Kinta (26/05).
Nia dehan, durante ne’e Sekretáriu Estadu Juventude no Desportu (SEJD), esforsu hodi regulariza artemarsiais tanba nasaun no estadu ida ne’e ema hotu iha lei nia okos.
“Regulariza imi nia situasaun signifika legaliza imi katak imi mós organizasaun ida iha fatin iha nasaun ida iha Timor-Leste hanesan livre no independente, hatene prosesu ida ne’e la’o di’ak loos no ha’u kontente,” Nia deklara.
Governu daudaun ne’e tau ona osan ba arte marsiais sira hodi apoiu halo fatin hodi arte marsiais sira halo atividade hodi kontribui ba dezenvolvimentu nasionál.
“Governu agora tau ona osan oituan hodi halo imi nia fatin, atu nune’e imi nakar governu sei ba buka de’it imi iha imi nia knua maibé la’ós ba buka iha lemo-lemo”, hakotu.
Entretantu, Sekretáriu Estadu Juventude no Desportu (SEJD), Abrão Saldanha, konsidera Artemarsias PSHT IKS no KORK inklui Arte rituais 77 mak futuru ba Timor-Leste nian, tanba iha organizasaun sira ne’e nia nia laran iha joven barak halibur iha ne’ebá.
“Ohin ita halo abertura ba rating Artemarsias no rituais sira iha Dili laran hodi bele treinu iha fatin públiku ona la presiza ba treinu subar ka helik ona, no governu sei hamutuk ho imi nia lider sira hodi ba vizita imi nia fatin, governu hakarak halo ida ne’e tanba haree iha Artemarsias no Rituais nia laran ne’e imi mesak joven de’it no futuru Timor-Leste nian,” nia dehan.
Nia hatete, ho abertura artemarsiais tolu ne’e maka agora ba oin membru sira la’ós ona ba tuku malu tebe malu iha dalan ibun maibé iha ona fatin hodi hatudu ida-idak nia talentu.
“Agora se mak tuku malu tebe malu iha dalan ne’e la’ós treinu, imi prepara an tinan ida ne’e ami prepara kondisaun tinan oin ita hahú kompete iha ne’e, se mak jagoan mai tuku malu iha palku leten,” deklara Nia.
Nia mós husu ba lider arte marsiais sira atu prepara membru ho di’ak nune’e bainhira iha kompetisaun internasionál ruma bele delega ninia membru ka atleta sira hodi partisipa no bainhira rezultadu di’ak bele hamorin Timor nia naran iha mundu.
“Horisehik ita nia Atleta sira lori medalla mai Timor-Leste Atleta na’in haat lori medalla lima mai nasaun no governu sei fó subsídiu boot ba sira, espera iha tinan oin imi Artemarsias sura mós bele ba kompete iha li’ur hodi lori nasaun nia naran,” nia dehan.
Nia kompromete sei kria kondisaun di’ak ba organizasaun arte marsiais sira ne’e hodi nune’e bele hala’o atividade ho di’ak.(Lee Notísia Seluk Iha Jornál Timor Post/ Asesu You Tube Timor Post)
1,083 total views, 3 views today
Bele hare Video Seluk :
Subscribe to Timorpost
